NASA-ի ղեկավարը ազդարարում է տիեզերքի նվաճման նոր դարաշրջանի սկիզբը

NASA-ի ղեկավար Չարլզ Բոլդենը հայտարարել է, որ առաջին մասնավոր թռիչքը դեպի Միջազգային տիեզերական կայան խորհրդանշում է տիեզերքի նվաճման նոր դարաշրջանի սկիզբը։ Երեքշաբթի օրը ամերիկյան SpaceX ընկերությունը երկրորդ փորձից իրագործել է Falcon հրթիռի մեկնարկը, որը պիտի բեռնատար տիեզերանավը հասցնի ՄՏԿ։

Մեկնարկը տեղի է ունեցել Գրինվիչի ժամանակով 07։44 Ֆլորիդայի Կանավերալ հրվանդանից։

Մինչև օրս մասնավոր սեկտորին անհասանելի էր նման պրոյեկտի իրագործումը, իսկ դեպի տիեզերք թռիչքները իրականացվում էին պետական գործակալությունների, ինչպիսին են NASA-ն և EKA-ն, ֆինասավորմամբ։ 

«Այս օրվա նշանակությունը հնարավոր չէ գերագնահատել», - հայտարարել է Ամերիկյան տիեզերական ընկերության նախագահը։ «Առաջին անգամ է, որ ՄՏԿ-ին է փորձում կցվել մասնավոր ընկերության տիեզերանավը. անելիքներ դեռ շատ կան, սակայն արդյունքներից մենք չափազանց գոհ ենք»։

2 օրից տիեզերանավը կհասնի ՄՏԿ։ Այն կրում է ՄՏԿ-ին անհրաժեշտ 500 կգ ուտելիք, ջուր և սարքավորում։

«Մեզ թվում է, որ այս հարցում կարելի է զուգահեռներ անցկացնել 1990-ականներին ինտերնետի զարգացման տենդենցների հետ, քանի որ այն, ի հայտ գալով որպես կառավարական պրոյեկտ, հետագայում դարձավ նաև մասնավոր ընկերությունների գործունեության ոլորտ, ինչը հսկայական թափ հաղորդեց դրա զարգացմանը», հայտարարել է SpaceX ընկերության ղեկավար Էլըն Մասքը։

Այս իրադարձությունը նշանակալի է նաև նրանով, որ ցուցադրում է տիեզերական ռազմավարության հանդեպ ամերիկյան ղեկավարության նոր մոտեցումը։ NASA-ն պլանավորում է երկրորդական նշանակության թռիչքները հանձնել մասնավոր ընկերություններին՝ ֆինանսական միջոցները տնտեսելով ավելի մեծամասշտաբ ծրագրերի համար, ինչպիսիք են թռիչքները դեպի հեռավոր մոլորակներ։ Նախատեսվում է, որ մասնավոր ընկերություններն աստիճանաբար իրենց վրա կվերցնեն նաև տիեզերագնացների տեղափոխումը։

Շատլների թռիչքների ծրագրի փակումից հետո ԱՄՆ-ում չեն մնացել բազմակի օգտագործման մարդատար տիեզերանավեր։ Ենթադրվում է, որ նորերի նախագծումը, կառուցումը և թողարկումը ևս աստիճանաբար կյուրացվի մասնավոր սեկտորի կողմից։