Քոչարյանի` ակտիվ քաղաքականություն վերադառնալու թեման արծարծողները զբաղված են դատարկաբանությամբ

Որոշ լրատվամիջոցներ ժամանակ առ ժամանակ, իսկ վերջերս' բավականին հաճախ արծարծում են Ռոբերտ Քոչարյանի' ակտիվ քաղաքականություն վերադառնալու թեման։ Հատկապես էլեկտրոնային մամուլում վերջին շրջանում հաճախ կարելի է հանդիպել գլխավոր նյութեր, որոնց գլխավոր հերոսը ինքը' Քոչարյանն է։ Քոչարյանը գնաց Ռուսաստան, Քոչարյանը չգնաց Ռուսաստան, Քոչարյանը հանդիպեց Պուտինին, Քոչարյանը գնեց այսինչ ընկերությունը և այլն... Այն, որ Քոչարյանի անվան հոլովումը պատահականություն չէ, ակնհայտ է։ Այն, թե ում է ձեռնտու նրա անունը լրատվամիջոցներով անընդհատ պտտեցնելը, պարզ է դառնում, երբ հետևում ենք, թե հատկապես որ ԶԼՄ–ներն են զբաղված այդ գործով։

Այնինչ, թվում է' Ռոբերտ Քոչարյանի' մեծ քաղաքականություն վերադառնալու հնարավորության թեման վաղուց սպառված պետք է լիներ։ Բանն այն է, որ Հաագայի միջազգային քրեական դատարանում է գտնվում «Հայաստանի քաղաքացիներն ընդդեմ Ռոբերտ Քոչարյանի» փաստաթուղթը։

Նշված փաստաթուղթը վերաբերում է ոչ միայն 2008 թվականի Մարտի 1-ին և 2-ին Երևանի կենտրոնում տեղի ունեցած սպանդին, այլ նաև Քոչարյանի իշխանության տարիներին կատարված մի շարք աղմկոտ սպանություններին, Երևանի կենտրոնի բնակիչներին իրենց տներից բռնի տեղահանելուն և բազմաթիվ այլ փաստերին:

Հաագայի միջազգային քրեական դատարանի Դատախազի գրասենյակն էլ դեռևս 2010-ի հունիսին տեղեկացրել է, որ հաղորդումը գրանցվել է գրասենյակի հաղորդումների ռեգիստրում և կուսումնասիրվի' համաձայն Միջազգային քրեական դատարանի Հռոմի ստատուտի դրույթների:
Հաագայի միջազգային քրեական դատարանում, հետևաբար, ցանկացած պահի կարող է քրեական գործ հարուցվել սույն հաղորդման հիման վրա' դրանից բխող' Քոչարյանի համար տխուր հետևանքներով։

Սա մի դամոկլյան սուր է, որ կախված է Քոչարյանի գլխին, և անմտություն է կարծելը, թե արտաքին կամ ներքին որևէ ուժ կարող է իր քաղաքական շահերը պայմանավորել Ռոբերտ Քոչարյանի անձով։ Ուստի Քոչարյանի' ակտիվ քաղաքականություն վերադառնալու թեման անընդհատ արծարծող լրատվամիջոցներն ու դրա հետևում կանգնածները, որոնցից մի մասը Քոչարյանի անունն օգտագործում է իբրև քաղաքական «բոբո», իսկ մյուս մասն անկեղծորեն տենչում է նրա վերադարձը, իրանակում զբաղված են սովորական դատարկաբանությամբ։

Խորեն Տեր–Մկրտչյան