Մեկնարկում է «Նոր Անուններ» պատանի երաժիշտ կատարողների 2-րդ միջազգային փառատոն

ՀՀ մշակույթի նախարարության աջակցությամբ «Հայաստանի նոր անուններ» ծրագիրը (ղեկավար՝ մշակույթի գործիչների ընկերակցության նախագահ, ՀՀ մշակույթի վաստակավոր գործիչ Սիլվա Մեքինյան) ս. թ. մայիսի 29-ից հունիսի 1-ը Երևանում կանցկացնի «Նոր Անուններ» պատանի երաժիշտ-կատարողների 2-րդ միջազգային փառատոնը:

Փառատոնի հովանավորը և գլխավոր գործընկերն է ՎիվաՍել-ՄՏՍ ընկերությունը:

Պատանի երաժիշտ կատարողների 2-րդ միջազգային փառատոնին կմասնակցեն մինչև 18 տարեկան շուրջ քառասուն շնորհալի երաժիշտներ Հայաստանից, Վրաստանից, Ֆրանսիայյից, Ռուսաստանից, Մալթայից, Ուզբեկստանից, Կորեայից: Փառատոնի մասնակիցները երևանյան ունկնդրին կներկայանան նվագախմբային և մենանվագ կատարումներով: Նրանցից շատերը բազմիցս ելույթներ են ունեցել աշխարհի հայտնի բեմերում, միջազգային ու հանրապետական մրցույթների, փառատոների բազմակի դափնեկիրներ և տարբեր հիմնադրամների կրթաթոշակառուներ են: «Նոր անուններ»-ի այս տարվա մասնակիցների թիվը շուրջ մեկ տասնյակով ավելին է մեկնարկային նախորդ տարվանից: Տարբերվում է նաև աշխարհագրությունը:

Ելույթները կկայանան Հայաստանի պետական ֆիլհարմոնիկ (գեղարվեստական ղեկավար և գլխավոր դիրիժոր՝ Էդուարդ Թոփչյան) և Հայաստանի պետական կամերային (գեղարվեստական ղեկավար և գլխավոր դիրիժոր՝ Վահան Մարտիրոսյան) նվագախմբերի նվագակցությամբ:
Փառատոնի հանդիսավոր բացումը տեղի կունենա մայիսի 29-ին՝ Երևանի Կոմիտասի անվան կամերային երաժշտության տանը (սկիզբը՝ ժ.14.00-ին) Հայաստանի պետական կամերային նվագախմբի հետ համատեղ (դիրիժոր՝ Հարություն Արզումանյան): Փառատոնային հաջորդ համերգները կկայանան մայիսի 30-ին և 31-ին նույն համերգասրահում (սկիզբը՝ ժ. 18.00): Պատանի երաժիշտները հանդես կգան մենակատարումներով:

Փառատոնի եզրափակիչ համերգը տեղի կունենա Երեխաների պաշտպանության միջազգային օրը՝ հունիսի 1-ին, «Արամ Խաչատրյան» համերգասրահում (սկիզբը՝ ժ.18:00) Հայաստանի պետական ֆիլհարմոնիկ նվագախմբի հետ համատեղ (դիրիժոր՝ Հարություն Արզումանյան):
Փառատոնային օրակարգը կներառի նաև մասնակիցների համար մշակութային ծրագիր (այցելություններ Երևանի կարևորագույն մշակութային օջախներ, հուշարձաններ, Մայր Աթոռ ՍԲ Էջմիածին):

Փառատոնի մեկնարկին նվիրված՝ ՀՀ մշակույթի նախարարությունում հրավիրված ասուլիսին մասնակցում էին «Հայաստանի նոր անուններ» ծրագրի ղեկավար Սիլվա Մեքինյանը, տեղակալ Նոնա Ոսկանյանը, ՀՀ մշակույթի նախարարության ժամանակակից արվեստի վարչության գլխավոր մասնագետ Լիլիա Նիկոյանը: