Պրիմիտիվ պոպուլիզմ, VS պատասխանատվության գիտակցում. հին ու նոր էլիտաների պայքարը՝ Հայաստանում

Որքան ավելի են մոտենում խորհրդարանական ընտրությունները, այնքան թեժանում է կարծիքների բախումը հայաստանյան քաղաքական դաշտի մշտնջենական հարցի շուրջ. այն է՝ միավորվե՞լ թե՞ ոչ: Ընդ որում, այդ հարցը քննարկման առարկա է թե՛ իշխանական, թե ընդիմադիր դաշտում: Երկու կողմերն էլ քաջ գիտակցում են, որ երկիրը կանգնած է լուրջ մարտահրավերների առջև, այլ հարց է, թե կողմերից յուրաքանչյուրն ինչ պատասխան է տեսնում այդ մարտահրավերներին: Որքանո՞վ են այսօր քաղաքական դաշտում գործող ուժերն ունակ լուծելու այն խնդիրները, որոնք առաջացել են մեծամասամբ իրենց իսկ սխալների, բացթողումների, թերացումների արդյունքում: Որքանո՞վ են պատրաստ ընդունելու սեփական ոչ կոմպետենտությունը: Պատասխանը, թերևս, ակնհայտ է:

Հայաստանյան քաղաքական դաշտն ավելի, քան երբևէ՝ կարիք ունի վերափոխումների: Նոր գաղափարների, նոր ուժերի քաղաքական դաշտ մուտք գործելը պարզապես օրվա պահանջն է: Մեր երկրին անհրաժեշտ են նոր քաղաքական ուժեր, որոնք իշխանությունը վերցնելիս չեն մոռանա վերցնել նաև պատասխանատվությունը պետության ապագայի հանդեպ, որոնք կունենան վաղվա օրվա հստակ տեսլականը և ամենակարևորը ՝ քաղաքական ուժերի հանդեպ ձևավորված տոտալ անվստահության պայմաններում կկարողանան ստանալ այն միակ քվեն, որը որևէ կերպ հնարավոր չէ կեղծել՝ ժողովրդի վստահության քվեն:

Նման ուժերի ջանքերի համախմբումն ընդհանուր նպատակների իրականացման համար կարող է տալ այդքան երկար սպասված դրական արդյունքը:

Կա՞ն արդյոք քաղաքական դաշտում նման ուժեր. միանշանակ՝ այո՛:

Վերջին շրջանում նոր, երիտասարդ, սակայն քաղաքական հասունությամբ աչքի ընկնող, պրիմիտիվ պոպուլիզմից հեռու քաղաքական ուժերի ի հայտ գալը հույս է ներշնչում, որ այսօր ավելի, քան երբևէ՝ հնարավորություն կա իրականացնել իրական փոփոխություններ: Կա իրական հնարավորություն՝ փրկելու քաղաքական դաշտը լճացումից, որի դեմ ժողովուրդը բողոքում է՝ արտագաղթելով: Հետևաբար, ստեղծված օրհասական պայմաններում՝ նոր գաղափարների, մոտեցումների, ուժերի և ջանքերի գեներացիան այլընտրանք ունենալ չի կարող:

Դա՛ է մեր երկրի զարգացման, հեղինակության վերականգնման և պետականակենտրոն համակարգի ձևավորման գրավականը: