«Հրապարակ». Տեղի է ունեցել Սերժ Սարգսյանի, Հովիկ Աբրահամյանի և Գագիկ Ծառուկյանի հանդիպումը

Հայաստանյան քաղաքական շրջանակները երեկ շունչները պահած սպասում էին, թե ինչով կավարտվի Սերժ Սարգսյան-Հովիկ Աբրահամյան նախագահականում տեղի ունեցող հանդիպումը, որն ավելի ուշ շարունակվել է Գագիկ Ծառուկյանի մասնակցությամբ: Ամենաանհանգիստը ԲՀԿ-ում էին՝ հազար ու մի պատճառներով: Նրանց ասվել էր, որ ժամը վեցին պետք է լինել «կանյաչնիում»: Չնայած որոշները պնդում էին, որ այդ հանդիպումը, այլ է՝ ԲՀԿ քաղխորհրդի նիստը առավել հավանական է այսօր տեղի ունենա՝ վերջնական դիագնոստիկայով. ԲՀԿ-ն մտնո՞ւմ է կոալիցիա, ինչպե՞ս, քանի՞ պորտֆելով, ո՞վ է դառնում Աժ նախագահ: Կղեկավարի՞ Հովիկ Աբրահամյանը Աժ-ն, թե՞ ոչ՝ կախված է նրանից, թե որքան կլինի նրա իրական ազդեցությունը ԲՀԿ-ի վրա՝ որոշումներ կայացնելու գործում: Որպես «առաջին և առայժմ վերջին դաս»՝ նա պետք է կարողանա ԲՀԿ-ից լիկվիդացնել ԲՀԿ համամասնական ցուցակի երկրորդ և չորրորդ համարներին՝ Վարդան Օսկանյանին և Գուրգեն Արսենյանին: Եթե փաստը կայացավ, ուրեմն նա Աժ նախագահ է՝ «հինգ րոպեն պակաս»: Եթե ոչ, որպես քաղաքական գործիչ, իր «մահվան» համար պետք է մեղադրի բացառապես Գագիկ Ծառուկյանին: Ի դեպ, Ծառուկյանն ուրբաթ օրվանից մի քանի օրով բացակայելու է հանրապետությունից: Թե ուր է մեկնում և ինչ նպատակով, հայտնի չէ: