«Հրապարակ». Քննարկե՞լ են պաշտոնանկությունների հարցը

«Երեկ մոտ երկու ժամ տևած ՀՀԿ գործադիր մարմնի նիստի ավարտից հետո Էդուարդ Շարմազանովն ասաց. «Տեղի ունեցավ աշխատանքային քննարկում ՀՀԿ գործադիր մարմնի ներկայացուցիչների հետ, որը վարեց կուսակցության նախագահ Սերժ Սարգսյանը. սա ամենշաբաթյա ավանդական քննարկումներ էին, որի ժամանակ քննարկել են ներքաղաքական խնդիրներ, այդ թվում Իջևանի քաղաքապետի ընտրությունները, ՀՀԿ պարտության պատճառները»:

Շարմազանովի խոսքով՝ չեն քննարկվել ոչ Սյունիքի մարզպետի հարցը՝ սպասում են իրավական գնահատականի, ոչ՝ ԱԺ նախագահի թեկնածուի, քանի որ Հովիկ Աբրահամյանը դեռ ԱԺ նախագահն է՝ «կոռեկտ չէ»: Սակայն նիստի ավարտից հետո դուրս եկած Հռիփսիմե Նաղդալյանին մի քանիսը շնորհավորեցին, և տիկնոջ տրամադրությունը գերազանց էր՝ գուցե ԱԺ փոխնախագահի պաշտոնն էր առիթը: Մեր տեղեկություններով, այնուամենայնիվ երեկվա նիստում Հանրապետականը պետք է քննարկեր Գեղարքունիքի, Արարատի, Սյունիքի, Տավուշի, Կոտայքի մարզպետների հարցը: Գեղարքունիքի ԲՀԿ-ական մարզպետին մտադիր են «ռակիրովկա» անել Կոտայքի մարզպետի հետ և Կոտայքը տալ Գագիկ Ծառուկյանին, որը, ասում են, այս պաշտոնում տեսնում է իր փեսային՝ Աբովյանի քաղաքապետին: Գեղարքունիքում թերևս կնշանակվի ՀՀԿ-ական Ռաֆիկ Գրիգորյանը: Արարատից Լոնդիկին ուզում են տեղափոխել Սյունիք, իսկ նրա փոխարեն նշանակվելու է գեներալ Մանվելի որդին՝ Կարեն Գրիգորյանը: Տավուշում հավանաբար մարզպետ կնշանակվի գեներալ Արշալույս Փայտյանը: Սրանք նախնական, բայց ստույգ տվյալներ են, չնայած դեռ կարող է ամեն ինչ փոխվել»,- հաղորդում է «Հրապարակ»-ը: