Սև մոգության հին հռոմեական սալիկները վերծանվել են

Սելիա Սանչես Նատալիասը (Սարագոսայի համալսարան) վերծանել է երկու կապարե սալիկ, որոնք, ըստ իր կարծիքի, կիրառվել են սև մոգության ծեսերում։ Այս մասին գրում է Live Science-ը, իսկ վերծանության արդյունքների մանրամասներն ամփոփված են Zeitschrift für Papyrologie und Epigraphik ամսագրում։ Մոտ 1600-ամյա սալիկները պահպանվում էին Բոլոնիայի քաղաքային հնագիտական թանգարանում 19-րդ դարից ի վեր։ Մինչև վերջերս դրանց բովանդակությունն անհայտ էր։

Նատալիասի խոսքերով, երկու նմուշների վրա պատկերված է ինչ-որ աստվածություն, ենթադրաբար՝ լուսնային Հեկատե աստվածուհին։ Պատկերներում աստվածուհու գլխից օձեր են դուրս գալիս, ինչը, ըստ գիտնականի, պիտի նշանակի, որ անեծքի ծեսերում օգտագործել են հենց օձեր։

Առաջին անեծքն ուղղված է սենատոր Ֆիստիուսի դեմ, որում, մասնավորաբար, ցանկություն է հայտնվում, որ նրա վերջույթները քայքայվեն։ Երկրորդ անեծքը ոմն անասնաբույժ Պորսելլոյի և նրա ընտանիքի դեմ է։ Սալիկները գրված են լատիներենով, և, հավանաբար, տարբեր անձանց կողմից։

Դրանց վրա պատկերված են նաև հենց իրենք՝ զոհերը՝ ներկայացված մումիաների տեսքով, խաչված ձեռքերով, որոնցից յուրաքանչյուրին փորագրված է զոհի անունը։ Նատալիասն ասում է, որ նմանատիպ «թուղթուգրերը» շատ տարածված են եղել ուշ հռոմեական ժամանակներում։