Տեղեկույթ «Սանահին» վանական համալիրի վերականգնողական աշխատանքների ընթացքի վերաբերյալ

ՀՀ մշակույթի նախարարության նախաձեռնությամբ 2010-2011 թթ. ընթացքում, մինչ հուշարձանի ամրակայման, վերականգնման նախագծանախահաշվային փաստաթղթերի կազմումը, իրականացվել են պահպանվածության առումով համալիրի առավել վթարված գլխավոր՝ արևմտյան թևի հուշարձանախմբի կառույցների համալիր գիտական ուսումնասիրություններ:

1. ՀՀ ԳԱԱ հնագիտության ու ազգագրության ինստիտուտի կողմից իրականացվել են տարածքի մասնակի պեղման ու հնագիտական հետախուզական աշխատանքներ:

2. Վենետիկի վերականգնման կենտրոնի և Բեռլինի բարձր տեխնոլոգիաների համալսարանի մասնագետների կողմից ժամանակակից լազերային սարքերով եռաչափ ճշգրիտ չափագրումների միջոցով նշվել են հուշարձանների պատերի ձևախախտումների ու ճաքերի առաջացման պատճառները, բնույթն ու դրանց ներկա վիճակը,

3. «Երկիր և մշակույթ» կազմակերպության ֆրանսիացի մասնագետներն ուսումնասիրել և ներկայացրել են առաջարկներ կառույցների ծածկերի ջրամեկուսացման արդի տեխնոլոգիաների կիրառման վերաբերյալ,

4.«ՀԱԿ պոլիտեխնիկ» արտադրական հետազոտական-հետազննական կոոպերատիվի կողմից բացվել և ուսումնասիրվել են Սբ Ամենափրկիչ տաճարի հիմքերն ու հիմնատակերը և տրվել է տեղանքի ինժեներաերկրաբանական պայմանների վերաբերյալ եզրակացություն,
5. «Հայսեյսմշին և ԿՊ ԳՀԻ» կողմից ներկայացվել են կառույցների տեխնիկական վիճակի վերաբերյալ եզրակացություններ ու հուշարձանների հետագա պահպանությանը միտված արդյունավետ միջոցառումների կիրառման առաջարկություններ:

Բացի վերը նշվածից՝ 2011 թ. ՀՀ մշակույթի նախարարության Մշակութային ծրագրերի իրականացման գրասենյակի կողմից հայտարարվել է մրցույթ Սանահնի վանական համալիրի կառույցների վերականգնման-ամրակայման նախագծային աշխատանքների ձեռքբերման վերաբերյալ, որի հաղթող է ճանաչվել «ԱՀԱՆԱ» ՍՊԸ-ն:

Ոողղորդվելով կատարված ուսումնասիրությունների տվյալներով ու հանձնարարականներով՝ հաղթող ճանաչված կազմակերպության կողմից մշակվել և նախարարության գիտամեթոդական խորհրդի 2012 թ. մայիսի 10-ին կայացած N4 նիստում քննարկվել ու հավանության է արժանացել համալիրի Սբ Աստվածածին և Սբ Ամենափրկիչ եկեղեցիների, նրանց հարակից նախագավիթ-տապանատան, գավթի և Գրիգոր Մագիստրոսի ճեմարանի վերականգնման-ամրակայման նախագծերը, որոնք սահմանված կարգի համաձայն հանձնվել են փորձաքննության:

Նախարարության կողմից համաձայնեցված և սահմանված կարգով փորձաքննություն անցած նախագծերով՝ ըստ հաստատված ժամանակացույցի, 2012 թ. երրորդ եռամսյակում կմեկնարկեն Սանահին վանական համալիրի վերոնշյալ հուշարձանների վերականգնման-ամրակայման աշխատանքները: