«Հայկական Ժամանակ». Գագիկ Ծառուկյանը մեկնել է Հայաստանից

Հանրապետականները երեկ ակնհայտ վատ տրամադրության մեջ էին: Նախօրեին՝ մինչև կեսգիշեր նրանք վստահեցնում էին, որ «Բարգավաճ Հայաստանի» հետ կոալիցիա ձևավորվելու է և միայն երեկ առավոտյան ճիշտ հակառակը պարզվեց:

««Բարգավաճ Հայաստանը» նպատակահարմար չի գտնում մասնակցել կոալիցիոն կառավարության ձևավորմանը»,- երեկ կեսօրին մոտ այսպիսի բովանդակությամբ հայտարարություն տարածվեց ԲՀԿ նախագահ Գագիկ Ծառուկյանի անունից: Սույն հայտարարությունից հետո վերջինիս որևէ հարց փոխանցելու հնարավորություն այլևս չկար, քանի որ պարզվեց՝ մեկնել է Հայաստանից: Ծառուկյանի հայտարարությունն անակնկալ էր նույնիսկ որոշ ԲՀԿ-ականների և ԲՀԿ-ամերձ շրջանակների համար: Ուշագրավ է, սակայն, որ այդ հայտարարության մեջ որևէ բան չի ասվում, թե առաջիկա նախագահական ընտրություններում ԲՀԿ-ն հանդես է գալու սեփակա՞ն թեկնածուով, թե՞ սատարելու է այլ թեկնածուի: Այս հարցի պատասխանը ԲՀԿ անդամները երեկ այդպես էլ չտվեցին: Ավելին, և Ծառուկյանի խոսնակը, և ԲՀԿ խոսնակն համառորեն չպատասխանեցին լրագրողների հարցերին: