Թուրքիայի վարչապետն այլևս չի վստահում Սիրիայի իշխանություններին

Թուրքիայի վարչապետ Ռեջեփ Թայիփ Էրդողանն այսօր հայտարարել է, որ կորցրել է վստահությունը Սիրիայի իշխանությունների նկատմամբ։ Նա նաև զգուշացրել է Բաշար ալ-Ասադին, որ եթե նա շարունակի արյունոտ ճնշումները ցուցարարների նկատմամբ, կհայտնվի համաշխարհային այն առաջնորդների կողքին, ովքեր իրենց անունն արյունով են գրել պատմության մեջ։ 

Ռեջեփ Թայիփ Էրդողանը նաև կոչ է արել պատժել Ասադին՝ Սիրիայում թուրքական դիվանագիտական շենքերի վրա հարձակվելու համար։ Մինչ այդ, Արաբական երկրների լիգան դադարեցրել էր Սիրիայի անդամակցությունը։ Ավելի վաղ թուրքական կառավարությունը լավ հարաբերություններ ուներ Սիրիայի իշխանությունների հետ, սակայն այս տարվա մարտից սկսված՝ արյունոտ հակակառավարական ցույցերի պատճառով՝ պաշտոնական Անկարան փոխեց իր դիրքորոշումը։ Հաղորդում է թուրքական "Hurriyet"–ը։