Եթե ԲՀԿ-ին տան վարչապետի պաշտոնը, իրենք կանցնեն մյուս դաշտ. Հրանտ Բագրատյան

Երեկ կեսօրին ԲՀԿ ղեկավար Գագիկ Ծառուկյանը հայտարարություն է տարածել, թե հրաժարվում է ՀՀԿ-ի հետ կոալիցիա կազմել: «Հրապարակ»-ը փորձել է այս մասին զրուցել ՀՀ նախկին վարչապետ, ՀԱԿ անդամ Հրանտ Բագրատյանի հետ:

-«Բարգավաճ Հայաստան» կուսակցությունը հրաժարվեց կոալիցիա մտնել, ինչպե՞ս կգնահատեք այս փաստը, քաղաքական դաշտում դա ի՞նչ փոփոխություններ կբերի, արդյոք կառողջացնի՞ քաղաքական մթնոլորտը:

-Նախ պետք է հասկանալ, որ դեռևս հայտարարության հետ գործ ունենք, և չպետք է բացառել, որ կարող է վիճակ փոխվել, և վաղը մեկ այլ հայտարարություն լինի: Այս պահի դրությամբ այդ քաղաքական ուժը՝ ԲՀԿ-ն, հայտարարում է, որ ավելի մեծ հավակնություններ ունի, քան պատրաստ է իրեն տրամադրել ՀՀԿ-ն:

-Այսնքն ՀՀԿ-ի և ԲՀԿ-ի կողմից իշխանության սակարկման արդյունքում համաձայնության չգալու պատճառո՞վ արվեց ԲՀԿ ղեկավարի հայտարարությունը: Ի դեպ, որոշ ՀՀԿ-ականներ արդեն հասցրել են հայտարարել, որ ՀՀԿ-ն կոալիցիա կազմելու առաջարկով հանդես չի եկել:

-Ես չեմ հավատում, շատ լավ էլ առաջարկ եղել է, հիմա ձևի համար են ասում, պարզապես ԲՀԿ-ին չի տրվել այն, ինչ նա ուզում էր:

-Ո՞րն է այս ամենում ՀՀԿ-ի կորուստը:

-Եթե կոալիցիա լիներ, ՀՀԿ-ն երկրում կատարվող բոլոր գործողությունների պատասխանատվությունը գցելու է բոլոր հիմնական կուսակցությունների վրա, իսկ հիմա պատասխանատվությունն ամբողջությամբ իր վրա է մնում:

-Իսկ ԲՀԿ-ն ի՞նչ կշահի:

-Շանս ունի իսկապես քաղաքական ուժ դառնալու:

-Դուք վստահություն ունե՞ք, որ ԲՀԿ-ն իսկապես ընդդիմադիր դաշտում կգործի:

-Իհարկե ոչ: Հենց հիմա էլ, եթե ԲՀԿ-ին տան ավելին, այսինքն՝ վարչապետի պաշտոնը, իրենք կանցնեն մյուս դաշտ: Վերջին հաշվով, քաղաքականության մեջ դա պատահում է:

-Եթե այնուամենայնիվ ԲՀԿ-ն հետագայում գործի թեկուզ ոչ արմատական ընդդիմության դաշտում, այդ դեպքում ՀԱԿ-ԲՀԿ համագործակցությունը հավանական համարո՞ւմ եք:

-Ես ՀԱԿ-ի անունից չեմ կարող խոսել, սակայն նայած ինչ եք հասկանում համագործակցության տակ: Եթե վաղը ՀԱԿ-ը խորհրդարանում բարձրացնի իր տնտեսական և քաղաքական ծրագրերը, և դրան միանա ՀՀԿ-ն, ԲՀԿ-ն թե որևէ այլ ուժ՝ թող միանան: