Հայաստան-Ֆրանսիա. նոր հեռանկարներ

Նոյեմբերի 15-ին ԱԻ նախարար Արմեն Երիցյանն ընդունեց ՀՀ-ում Ֆրանսիայի արտակարգ և լիազոր դեսպան Անրի Ռենոյին և Վրաստանում Ֆրանսիայի դեսպանատան անվտանգության հարցերով կցորդ Ստեֆան Ռոպերին։

Ողջունելով հյուրերին՝ Արմեն Երիցյանը նշեց, որ Արտակարգ իրավիճակների նախարարությունը բազմաթիվ ուղղություններով համագործակցում է ֆրանսիացի գործընկերների հետ, և հույս հայտնեց, որ այդ համագործակցությունը շարունակական կլինի։

Դեսպան Ռենոն նշեց, որ այս ամառ ԱԻ նախարարի այցը Ֆրանսիա ևս մեկ անգամ ապացուցեց, որ Արտակարգ իրավիճակների նախարարությունն իրական համագործակցողներից է։ «Դատելով մեր նախորդ հանդիպումներից՝ կարող եմ ասել, որ մեր համագործակցությունը ոչ միայն շարունակական պիտի լինի, այլև պիտի ընդարձակվի՝ ներառելով նոր ոլորտներ և ուղղություններ,- ավելացրեց դեսպանը։

Նախարար Երիցյանը ներկայացրեց Նախարարության գործունեության հիմնական ուղղությունները։ Քաղաքացիական պաշտպանության ուղղությամբ Հայաստանում իրականացվող աշխատանքները լայնածավալ են, տարածաշրջանում առաջինը Հայաստանն ստեղծեց Աղետների ռիսկի նվազեցման ազգային պլատֆորմ, մշակեց ԱՌՆ ազգային ռազմավարությունը։ Այսօր Արտակարգ իրավիճակների նախարարությունում գործում է Ճգնաժամային կառավարման կենտրոն, որի ստեղծման և կայացման գործում կա նաև ֆրանսիացի գործընկերների նեդրումը։

Ֆրանսիայի և Հայաստանի համագործակցության կարևոր ուղղություններից է կամավոր հրշեջ-փրկարարների համակարգի ստեղծումը Հայաստանում։ «Տեսնելով Ֆրանսիայում հասարակական հիմունքներով աշխատող հրշեջ-փրկարարների փորձը՝ այսօր փորձում ենք նման համակարգ ներդնել Հայաստանի Շիրակի և Լոռու մարզերում։ Կարծում եմ՝ կամավոր հրշեջ-փրկարարական համակարգի ֆրանսիական տարբերակը լավագույններից է, և մենք շատ բան ունենք սովորելու այդ ուղղությամբ»,- նշեց նախարարը։

Ստեֆան Ռոպերը Վրաստանում Ֆրանսիայի դեսպանատան անվտանգության հարցերով կցորդ նշանակվելուց անմիջապես հետո ցանկություն հայտնեց այցելել Հայաստան և ծանոթանալ մեր երկրների միջև առկա համագործակցությանը։ «Կարծում եմ, որ շարունակելով քաղաքացիական պաշտպանության բնագավառում մեր երկրների միջև եղած համագործակցությունը, անհրաժեշտ է ավելացնել նոր ուղղություններ»,- նշեց պարոն Ռոպերը։

ԱԻ նախարարի ուղեկցությամբ՝ հյուրերը շրջեցին Ճգնաժամային կառավարման կենտրոնում, ծանոթացան դրա տեխնիկական հնարավորություններին և աշխատանքային պայմաններին։ ԱԻ Նախարարության բարձրահարկ սեյսմակայուն նորակառույցը ոչ միայն լավ տպավորություն թողեց հյուրերի վրա, այլև մեծ ցանկություն առաջացրեց այդ շենքում շուտափույթ տեսնել համագործակցության նոր արդյունքները։