Պաշտոնական Երևանին ևս մեկ անգամ հասկացրին, որ հակառակորդը նախահարձակ լինելու արտոնություն ունի․ Մելիքյան

ԼՈՒՐԵՐ.com-ի զրուցակիցն է հայ քաղաքական գործիչ, ԼՂՀ նախկին արտգործնախարար Արման Մելիքյանը։ 

-Պարոն Մելիքյան, ղարաբաղյան հակամարտության կարգավորման հարցում հայաստանյան դիվանագիտությունն ի՞նչ պայմաններում է գտնվում։

-Դիվանագիտությունը միջազգային հարաբերությունների ասպարեզում երկրի պետական քաղաքականությունն իրականացնելու գործիքն է: Խելամիտ, ռազմավարական նպատակների ճշգրիտ ձևակերպմամբ առանձնացող և դրանց հասնելու համար անհրաժեշտ արդյունավետ մարտավարության առկայության պայմաններում դիվանագիտական գործիքների կիրառումը կարող է հսկայական օգուտներ բերել երկրին: Մեր պարագայում ընտրված քաղաքական մոտեցումները չեն ապահովում երկրի շահերի համարժեք առաջմղումը և, որպես դրա հետևանք, նաև հայկական դիվանագիտությունն է քարացել, զրկվել ճկունությունից և նախաձեռնողականությունից: Պաշտոնական Երևանի բանակցային փիլիսոփայությունը փակուղային է, իսկ դա աղետալի է հետևանքների է բերում և դիվանագիտական հարթակներում, և մարտի դաշտում:

-Այդ համատեքստում ինչպե՞ս կգնահատեք ԵԱՀԿ Մինսկի խմբի համանախագահների ուշացած հայտարարությունը՝ Չինարիում տեղի ունեցածի վերաբերյալ։

-Հայտարարությունը համաժեք է հայկական կողմերի քաղաքական ու դիվանագիտական պահվածքին՝ համանախագահներն ուղիղ տեքստով ասացին, որ նախկինում ձեռք բերված բոլոր պայմանավորվածությունները պետք է պահպանվեն, բայց, ըստ էության, այդ հրամայական պահանջը բացառապես մեզ է վերաբերվում:

-Արդյոք հայկական կողմը համանախագահների կողմից ստացավ աջակցություն, թե հակառակը՝ նախատինք ստացավ ադրբեջանցի դիվերսանտի մարմինը չհանձնելու համար։

-Պաշտոնական Երևանին ևս մեկ անգամ հասկացրին, որ հակառակորդը նախահարձակ լինելու արտոնություն ունի և այդ արտոնությունը կպահպանվի այնքան ժամանակ, մինչև որ Հայաստանը կամ կհամաձայնի կարգավորման ադրբեջանական տարբերակին, կամ էլ արմատապես կփոխի սեփական բանակցային մոտեցումները:

-Ըստ Ձեզ՝ հայկական կողմը ի՞նչ պայմաններում պետք է հանձնի դիվերսանտի դին։
Գերմանացի քաղաքագետ Ալեքսանդր Ռարը կարծում էր, որ այդ հայտարարությունը հավասարակշռված էր։ Դուք այդպես կածո՞ւմ եք։

-Այն ոչ թե հավասարակշռված է, այլ համարժեք է առկա իրավիճակին: Քանի դեռ պաշտոնական Երևանը քաղաքական-դիվանագիտական անճարակության է մատնված, այս կարգի սահմանային մարտական միջադեպերը շարունակական բնույթ են ունենալու, իսկ միջնորդներն էլ հանդես են գալու հակառակորդի ռազմական ակտիվությունը գործնականում քաջալերող հայտարարություններով:

-Արդյոք այդ հայտարարությունը հայկական կողմի համար շանս է կրկին պնդելու հետաքննական մեխանիզմների ներդրման անհրաժեշտության մասին։

-Քաղաքականությունը լալահառաչ ճամարտակությունների միջոցով չէ, որ արդյունքի է հասնում՝ իրավիճակը շտկելու համար շատ կոնկրետ քայլեր են անհրաժեշտ: Թեև կարելի է բեկում մտցնել բանակցային գործընթացում, այդուհանդերձ, ՀՀ և ԼՂՀ գործող իշխանությունները այս խիստ անբարենպաստ ընթացքը կասեցնելու համար անհրաժեշտ շահագրգռությունը չեն դրսևորում:

Հարցազրույցը՝ Քրիստինա Աղալարյանի