Առաջին ցամաքային կենդանիները քայլելու ընդունակ չեն եղել

Ջրից ցամաք դուրս եկած առաջին էակները չէին կարող ցամաքում տեղաշարժվել այնպես, ինչպես դա անում են ժամանակակից երկկենցաղները։ Գիտնականները եկել են այս եզրակացության՝ ուսումասիրելով և համակարգչային մոդելավորման ենթարկելով առաջին ցամաքային կենդանիների անատոմիան։ Աշխատանքը տպագրված է Nature պարբերականում, իսկ դրա վերաբերյալ համառոտ տեղեկացնում է BBC News-ը։

Մասնագետներն ուսումնասիրել են իխտիոստեգ (զրահաձուկ) անվանումը ստացած կենդանու բրածո մնացորդները։ Այն ապրելիս է եղել 360 միլիոն տարի առաջ և համարվում է ձկների և երկկենցաղների կապող օղակը։ Մինչ այժմ մասնագետների մոտ շրջանառվում էր այն տեսակետը, ըստ որի ցամաքում իխտիոստեգները գրեթե հավասարապես էին օգտագործում բոլոր չորս վերջույթները, և դրա քայլվածքն առանձնապես չէր տարբերվում, ասենք, սալամանդրերի շարժուձևերից։

Այս վարկածը ստուգելու նպատակով նոր հետազոտության հեղինակները մանրակրկիտ կերպով վերստեղծել են կենդանու կմախքը։ Ձեռքի տակ եղած մնացորդներն ուսումնասիրվել են տոմոգրաֆիկ մեթոդով՝ դրանք միներալներից հանելու արդյունքում չվնասելու նկատառումներով։

Գիտնականները եզրակացրել են, որ իխտիոստեգների վերջույթները չէին կարող ազատ շարժումներ իրականացնել սալամանդրերի պես։ Ցամաքով տեղափոխվելիս նրանք հենվել են դիմացի թաթերի վրա՝ դեպի իրենց ձգելով մարմնի մնացած հատվածը։ Ետին վերջույթները ունակ են եղել միայն այնպիսի շարժումների, ինչպիսիք նկատվում են ժամանակակից ծովառյուծների և փոկերի մոտ։

Նոր արդյունքները գիտնականներին հարկադրում են վերանայել իրենց տեսակետները կենդանի օրգանիզմերի էվոլյուցիայի վաղ շրջանների վերաբերյալ։

Գիտնականները հետագայում նպատակ ունեն ամբողջապես վերստեղծել կենդանու արտաքին տեսքը, որը բաղկացած կլինի ոչ միայն կմախքից, այլև փափուկ հյուսվածքներից։