Այն ուժերը, որոնք ձեռք են տալիս իշխանություններին, մի քանի մանդատով կհայտնվեն խորհրդարանում. Արամ Հարությունյան

ԼՈՒՐԵՐ.com-ի զուցակիցն է «Ազգային համաձայնություն» կուսակցության նախագահ Արամ Հարությունյանը:

-Պարոն Հարությունյան, ինչպե՞ս կգնահատեք այսօր Հայաստանում տեղի ունեցող նախընտրական գործընթացները, ձևավորված դաշինքների աշխատանքները:

-Գիտեք՝ ամենաիդեալական տարբերակն այն կլիներ, որ ընդդիմությունը հանդես գար մեկ միասնական դաշինքով, բայց քանի որ սա տեսական տարբերակ է, հիմնականում անհնար է: Իսկ այն ուժերը, որոնք ընդամենը նպատակ ունեն՝ մի քանի մանդատ ձեռք բերել, բնականաբար, շահագռգռված չեն խոշոր դաշինքների: Ընդդիմադիրների ցանկացած հարված միմյանց՝ իշխանությունների ջրաղացին ջուր լցնել է: Այստեղ շատ կարևոր է, որ մեծ դաշինքների պարագայում իշխանությունները խնդիրներ են ունենալու, որովհետև ընտրությունները քաղաքականացվելու են: Եթե մեծ դաշինքներ չեղան, ապա ընտրությունները ապաքաղաքականցվելու են, այսինքն՝ թաղային հեղինակություններն են որոշիչ լինելու: Իսկ այդ իմաստով, ինչպես նաև ֆինանսական և վարչական լծակների առումով՝ իշխանությունները մրցակցությունից դուրս կլինեն:

Որպեսզի քաղաքացին հավատա, որ իր կյանքում ինչ-որ բան կարող է փոխվել, պետք է խաղի մեջ մտնեն ուժեր, որոնք հավակնում են խորհրդարանում ունենալ գոնե այնպիսի ներկայացվածություն, որի հետ հաշվի կնստեն: Այն ուժերը, որոնք ձեռք են տալիս իշխանություններին, մի քանի մանդատով կհայտնվեն խորհրդարանում և կասեն՝ մենք պահեցինք մեր ձայները, մեզ ժողովուրդն այդքան ձայն տվեց, հետո 5 տարի միգուցե հայհոյեն իշխանություններին, համաձայնեցված, որից ո՛չ երկիրը կշահի, ո՛չ հասարակ քաղաքացին: Դրա համար՝ այսօր Հայաստանում միակ տարբերակը խոշոր դաշինքների և իշխանություններին մրցակից ուժերի ներգրավվածությունն է, և այն մարդիկ, ովքեր կարող են համախմբվել: Ինչպես օրինակ՝ Համաժողովրդական շարժումն էր: Եթե ապրիլյան ընտրություններին խոշոր ուժեր ու դաշինքներ չմասնակցեն, իշխանություններին հաջողվելու է ստանալ մեծամասնություն:

-Իսկ «Ելք դաշինքի մասով ի՞նչ կասեք: Դաշինքի անդամ ՔՊ-ն արդեն ներկայացրել է իր համամասնական ցուցակը, որը գլխավորում է Նիկոլ Փաշինյանը: Այդ դաշինքն էլ է Ձեր ասած իշխանություններին ձեռնտու դաշինք:

- Օրինակ՝ այդ դաշինքի անդամներն ասում են, որ իրենք կհավաքեն 10-15 տոկոս: Ասում եմ՝ լավ, ռեյտինգայինում ո՞ւմ եք թեկնածու ներկայացնելու, իրենք ասում են այնպիսի մարդու անուն, որին ոչ ոք չի ճանաչում: Այդ դաշինքը լավագույն դեպքում անցողիկ շեմը կարող է հաղթահարել, բայց իշխանափոխության լուրջ խնդիր ստեղծել չի կարող: Այսօր նույն մարդիկ խորհրդարանում են, հետո կունենանք 3 թե 10 պատգամավոր, էական ոչ մի բան չի փոխվում: Նույն Նիկոլ Փաշինյանը, Էդմոն Մարուքյանը խորհրդարանում են, բայց դրանից ոչինչ չի փոխվում: Ակնհայտ է, որ այդ ուժը չի գնում վերցնելու 50 տոկոս պլյուս մեկը: Հետևաբար, իրենք գնում են ԱԺ-ում ունենալու մի քանի մանդատ, որը ոչինչ չի տալու, իսկ իշխանություններին ձեռք է տալու: Եթե անգամ չհաղթահարեն շեմը, իրենց կօգնեն: Հիմա, եթե այն ուժերը, որոնք նպատակ չունեն իշխանափոխության կամ չեն նպաստում դրան, կամ փորձում են ցեխ շպրտել մյուս ընդդիմադիրների վրա, ըստ էության, վերջնական արդյունքում լեգետիմացնելու են ապագա ընտրությունները, ինչպես 2013-ին արեցին նախագահի որոշ թեկնածուներ:

Քրիստինա Աղալարյան