Աշոտ Աղաբաբյանի կարծիքով ՀՀԿ-ում տխմարներ կան, սակայն նա չի պատրաստվում լքել կուսակցությունը

«Ես սպասում եմ գործադիր մարմնի որոշմանը: Ուրիշ տեղից առաջարկ որ լինի էլ՝ չեմ գնա. ես ՀՀԿ կուսակցության անդամ եմ, ո՞նց կարող եմ ուրիշ կուսակցության միանալ»,- այս մասին ԼՈւՐԵՐ.com-ի թղթակցի հետ զրույցում ասաց պատգամավոր Աշոտ Աղաբաբյանը՝ պատասխանելով այն հարցին՝ արդյո՞ք կընդգրկվի ՀՀԿ-ի ռեյտինգային ցուցակում, կամ՝ նման առաջարկ ստացե՞լ է, թե՞ ոչ:

Հարցին՝ արդյոք նեղացած չէ՞ ՀՀԿ-ից, պարոն Աղաբաբյանը պատասխանեց.

«Ես իմ կուսակցական ընկերներից նեղացած չեմ, ես նեղացած եմ հարկային դաշտից, իշխանությունների որոշ լծակներից: Սխալ է այն մոտեցումը, երբ կուսակցական որևիցե մեկին, ով տնտեսական լծակներ կամ սեփականություն ունի, կուսակցությունը պետք է ասի՝ «հարկայի՛ն, հանկարծ չմոտենաս նրան»: Ո՛չ, թող մոտենան, բայց՝ ճի՛շտ մոտեցում ցույց տան: Իշխանությունների այս վերաբերմունքից եմ նեղացած: Որ կուսակցական ես, դա չի նշանակում՝ ինչ ուզենաս պետք է անես: Սեփականություն ունեցողը պետք է օրենսդրական դաշտում վճարումներ կատարի, բայց կան այնպիսի օրենքներ, որոնք ընդունելի չեն»:

Խոսելով խորհրդարանական ընտրություններին ՀՀԿ-ի մասնակցության և հնարավոր պարտության մասին, Աշոտ Աղաբաբյանը վստահաբար նշեց, որ ՀՀԿ-ն երբեք չի պարտվի, կհաղթի 60 տոկոսով:

«Վատ իշխանություն ունենք, որը չի կարողանում ծրագրեր իրագործել տարբեր պատճառներով, բայց դա չի նշանակում, որ դա կուսակցության մինուսն է: ՀՀԿ-ում տխմարներ կան, ովքեր փորձում են մի բան անել, բայց բանից դուրս է գալիս՝ տնտեսության վրա վերահսկողություն կա, իշխանության վրա վերահսկողություն՝ ընդհանրապես չկա: Նոր պառլամենտի առկայության ժամանակ, քանի որ կլինի պառլամենտական պետություն, վերահսկողություն կսահմանվի, և ով ուզում է գա իշխանության՝ չի՛ կարող ինչ ուզենա, ոնց ուզենա՝ անել: Իշխանության վրա պետք է վերահսկողություն իրականացնի նոր ընտրված պառլամենտը»,- ասաց Աշոտ Աղաբաբյանը:

Պարոն Աղաբաբյանը դրական է գնահատում վարչապետի և կառավարության փոփոխությունները. «Բոլորին թվում է՝ մի քանի ամսում առաջընթաց պետք է լինի: Նախ՝ հարկավոր է տեղը բերել ամեն ինչ: Եթե մի երկրում վարչապետները երկու տարին մեկ փոխվում են, այդ երկիրը ո՞նց կարող է հետ չմնալ նոր մարտահրավերներից ու նոր զարգացման ճանապարհներից. պետք է հետ մնա, բա ի՞նչ պետք է անի: Դրա համար՝ հարկավոր է նոր վարչապետին հնարավորություն տալ և օգտակար լինել, որ ծրագրերն իրականանան: Կարծում եմ՝ այդ ամենը կլինի ընտրություններից հետո»:

ԱԺ-ում իր գործունեության պասիվությունը, ըստ մեր զրուցակցի՝ պայմանավորված է այն օրենքներով, որոնց հետ համաձայն չէ ու ընդունելի չեն իր համար, և այդ օրենքների պատճառով երկրի վիճակը  տնտեսապես լավ չէ. «Հարկային դաշտում բավականին լուրջ օրենքներ կան, որոնք անիմաստ բաներ են: Փոփոխություններ պետք է անի նոր Ազգային ժողովը»:

Մեր զրուցակցի կարծիքով՝ պետք է մաքրել ոչ թե քաղաքական դաշտը, այլ՝ տնտեսականը, որպեսզի բոլորի համար հավասար պայմաններ լինեն և երկիրը զարգանա: Մոնոպոլիստ հասկացողություն պետք է չլինի: Պետք է տնտեսական դաշտը բաց լինի, որպեսզի կոռուպցիոն ռիսկեր չլինեն:

Եզրափակելով խոսքը՝ Աշոտ Աղաբաբյանը նշեց՝ անկախ նրանից ինքն ընտրացուցակում կլինի, թե ոչ, ամեն ինչ անելու է, որ «Հանրապետական» կուսակցությունը հաղթի.  «Ես մեծ ընտրազանգված ունեմ և ամեն ինչ անելու եմ, որ Հանրապետական կուսակցությունը հաղթանակ տանի: Իմ կուսակից ընկերներին և ընտրազանգվածին խնդրում եմ ուշիմ լինել, քանի որ նոր պետական կառավարման համակարգ ենք անցնում: Հարկավոր է վստահել այն մարդկանց, ովքեր իրենց հետ երկար տարիներ աշխատել են և չեն կորցրել վստահությունը»:

Սոնա Հարությունյան