Մեկնարկեց «WebԾիրան» առաջին համահայկական օնլայն կինոփառատոնը

Նոյեմբերի 16-ին webtv.am ինտերնետ հեռուստատեսությամբ մեկնարկեց «WebԾիրան» առաջին համահայկական օնլայն կինոփառատոնը:

Մինչև դեկտեմբերի 20-ը փառատոնի շրջանակներում կցուցադրվի մինչև 20 րոպե տևողության ամենատարբեր ժանրերի 35-ից ավելի ֆիլմ՝ 6-ից 8 ֆիլմ յուրաքանչյուր շաբաթ:

Կցուցադրվեն նաև ֆիլմեր՝ նկարահանված ԱՄՆ-ում, Ռուսաստանում ապրող մեր հայրենակիցների կողմից:

Փառատոնի ընթացքում ֆիլմերը կգնահատվեն ոչ թե որևէ ժյուրիի անդամների կողմից, այլ ինտերնետ քվեարկությամբ: Երկու գլխավոր՝ 1000 և 500 ԱՄՆ դոլարին համարժեք դրամային մրցանակները հաղթողներին կհանձնվեն դեկտեմբերի 25-ին՝ հատուկ հանդիսությամբ:

Կլինեն նաև խրախուսական անակնկալ մրցանակներ՝ «Ոսկե Ծիրան» միջազգային կինոփառատոնի, webtv.am ինտերնետ հեռուստատեսության և փառատոնի աջակից «Նովոստի Արմենիա» միջազգային լրատվական գործակալության կողմից:

«WebԾիրան»-ում չկան ո՛չ լեզվական, ո՛չ ժանրային, ո՛չ տեխնիկական չափորոշիչներով պայմանավորված սահմանափակումներ: Այս մոտեցումներն են որդեգրվել, քանի որ փառատոնն անցկացվում է առաջին անգամ, և այն այս անգամ դիտվում է որպես ստեղծագործողների համար՝ իրենց գործերը ներկայացնելու հարթակ, ինչպես նաև նրանց ոգևորելու, որոշակի կինոմթնոլորտ ստեղծելու քայլ:

«WebԾիրան» համահայկական կինոփառատոնի գլխավոր հովանավորն է «ՎիվաՍել-ՄՏՍ»-ը: