«Բարգավաճ Հայաստան»-ը խորհրդարանում կլինի ընդդիմություն. Արմեն Բադալյան

Մայիսի 31–ին, երբ լինի նորընտրի ԱԺ-ի նիստը և գործող կոալիցիոն կառավարությունը հրաժարական կտա, այդ պահից սկսած ԲՀԿ–ն ԱԺ–ում կլինի ընդդիմություն: Այս մասին Լուրեր.com-ի հետ զրույցում ասաց քաղաքական և ընտրական տեխնոլոգիաների մասնագետ Արմեն Բադալյանը:

Նրա խոսքերով, ԲՀԿ–ն ԱԺ-ում գործելու է պետական, իրավական կառավարման համակարգում, իսկ իրավական դաշտում քաղաքական ուժն ունենում է երկու կարգավիճակներից մեկը՝ կա՛մ իշխանություն է հանդիսանում, կա՛մ ընդդիմություն։

«Բնականաբար, եթե չես ձևավորում գործադիր իշխանություն, ուրեմն դու ունես մեկ կարգավիճակ՝ դու ընդդիմադիր ուժ ես։ Շատերն են ասում` արմատական ընդդիմություն, ոչ արմատական ընդդիմություն, բայց ընդդիմությունը արմատական կամ ոչ արմատական չի լինում, ընդդիմության կամ իշխանության քայլերն են լինում արմատական, ոչ արմատական։ Այնպես որ, ԲՀԿ–ն կլինի ընդդիմություն, բայց թե ինչպես կաշխատի որպես ընդդիմություն, ցույց կտա ժամանակը»,- ասաց Բադալյանը։

Արմեն Բադալյանը, անդրադառնալով հարցին, թե կա՞ արդյոք արտաքին ուժերի դերակատարությունը ներքաղաքական զարգացումներում, ասաց, որ չի կարող հստակ այդ հարցին պատասխանել:

«Քանի որ ինքս ԲՀԿ կառույցի ղեկավար կազմի հետ շփում չունեմ, բնականաբար ես չեմ կարող ասել` կա՞ այդ արտաքին ազդեցությունը, թե՞ չկա։ Կարող եմ միայն ենթադրել, որ կա, բայց հաստատ չեմ կարող ասել»,- ասաց նա։

Արմեն Բադալյանը նույն կերպ արձագանքեց նաև հարցին, թե որքանո՞վ է մեծ ՀՀ երկրորդ նախագահ Ռոբերտ Քոչարյանի ազդեցությունը ԲՀԿ-ի վրա:

«Չեմ կարող ասել` որ քաղաքական գործիչը, որ անձը ինչ ազդեցություն ունի, քանի որ ես ԲՀԿ կառույցի ղեկավար կազմի հետ շփում չունեմ: Իսկ ԲՀԿ–ն ինքը պաշտոնապես հայտարարել է, որ Ռոբերտ Քոչարյանի հետ որևէ առնչություն չունի։ Տվյալ պահին պետք է հիմք ընդունենք այդ հայտարարությունը»,-ասաց քաղաքագետը։

Արմեն Բադալյանը հավելեց, որ ՀՀԿ–ն շատ բան է կորցրել, քանի որ ՕԵԿ–ի հետ միասին խորհրդարանում նրանք կունենան մոտ 75 մանդատ, բայց միաժամանակ նրանցից մոտ 30-35-ը գործարարներ են, որոնք զբաղվելու են իրենց բիզնեսով, չեն գալու ԱԺ, ինչպես նախորդ բոլոր ժամանակաշրջաններում։ 

«Ըստ այդմ, բնականաբար, ՀՀԿ–ն հաջորդ խորհրդարանում կառավարությանն անհրաժեշտ օրենքներն անցկացնելու համար լուրջ խնդիր է ունենալու։ Արևմուտքը պահանջելու է, որպեսզի ՀՀԿ–ի կողմից նոր ձևավորված կառավարությունը իրականացնի տնտեսական բարեփոխումներ, որը չի բխում հենց ՀՀԿ–ի մեծամասնական ընտրակարգով անցած բազմաթիվ գործարար-պատգամավորների շահերից, և նրանք էլ. բնականաբար՝ ոչ բացահայտ, բայց սաբոտաժի կենթարկեն այդ օրենքների ընդունումը, և այդ ժամանակ ՀՀԿ–ն ստիպված է լինելու խնդրել ԲՀԿ–ի աջակցությունը։ Էլ չեմ ասում նախագահական ընտրությունները, որոնց մասին, սակայն, դեռ շուտ է խոսելը: Դրա մասին կխոսենք աշնանը»,-ասաց Բադալյանը և հավելեց, որ ՀՀԿ–ն միանշանակ կորցնում է, հատկապես այն դեպքում, որ «բոլորը լավ գիտեն, թե ՀՀԿ–ն ինչպես է «ընտրություններից» հետո խորհրդարանում այդքան տեղ գրավել»:

Բադալյանն ընդգծեց, որ ԲՀԿ–ն էլ իր հերթին որոշ բաներ կորցնում է, սակայն փոխարենը բազմապատիկն է ստանում։ 

«ԲՀԿ-ն կորցնում է վարչական ռեսուրս՝ որոշ նախարարներ, փոխնախարարներ, մարզպետներ, կորցնում է մի շատ փոքրիկ ընտրազանգված, որ իշխանություն լինելու համար եղել են ԲՀԿ–ի կողմից։ Ահա այսքանն է ԲՀԿ–ի կորուստը»,- ասաց նա:

Բադալյանի խոսքերով, ԲՀԿ–ն ավելի շատ շահում է, որովհետև նա իր քաղաքական ապագան չվտանգեց, քանի որ կոալիցիա կազմելով` քաղաքական ապագա չէր ունենալու։ ԲՀԿ–ն կշահի, եթե հետագա ամիսների ընթացքում իրականացնի էական փոփոխություններ, այդ թվում` կուսակցության քաղաքական որակի, այսինքն` հանդես գա ընդգծված քաղաքական դիրքով: Եթե ԲՀԿ-ն նաև որոշակի կազմակերպչական փոփոխություններ իրականացնի, ապա կշահի։

«ԲՀԿ–ն շահում է, որովհետև մնում է ազդեցիկ ուժ։ Այն պահպանում է իր վարանիշը,  ցույց է տվել, որ իրեն վստահած մարդկանց հավատը չի փոխում նախարարական պորտֆելների հետ: Եթե կուսակցությունը որոշակի քայլեր կատարի, որոնք արդեն թվեցի՝ կուսակցության քաղաքական կերպարի ապահովում, կազմակերպչական, քաղաքական փոփոխությունների իրականացում, ուրեմն այն ապագայում կողմնակիցների շատ ավելի մեծ բանակ կունենա, քան այս կոալիցիոն գործարքի զանգվածն էր»,- ասաց նա:

Բադալյանը նաև նշեց, որ ԲՀԿ-ն այս պահին մեծ վարկանիշ ունի, ինչը դրական ազդեցություն է ունենալու առաջիկա ընտրություններում մրցակցության ապահովման տեսանկյունից։

«Դա կարող է չլինել 2013–ին, բայց 2017-2018-ին ԲՀԿ–ն բավականին մեծ ազդեցություն կունենա, եթե արդյունավետ աշխատի»,- ասաց Բադալյանը:

Գայանե Համբարձումյան