Վերջին զանգի արարողություն՝ ՀՀ ՊՆ Մ. Մելքոնյանի անվան ռազմամարզական վարժարանում

Մայիսի 25-ին ՀՀ պաշտպանության նախարար Սեյրան Օհանյանն այցելել է ՀՀ ՊՆ Մոնթե Մելքոնյանի անվան ռազմամարզական վարժարան՝ մասնակցելու վարժարանի ավարտական դասարանի սաների վերջին զանգի հանդիսավոր արարողությանը, որին ներկա էին բարձրաստիճան զինվորականներ, ծնողներ և հյուրեր:

ՀՀ ՊՆ Մ. Մելքոնյանի անվան ռազմամարզական վարժարանի պետ, գնդապետ Վիտալի Ոսկանյանը, շնորհավորելով սաներին, ընդգծել է, որ նրանք ուսման ընթացքում պատվով կատարել են իրենց առջև դրված խնդիրները և արել են առավելագույնը մեր հաղթական բանակի մի կարևոր մասնիկը դառնալու համար: Գնդապետ Վիտալի Ոսկանյանը նշել է, որ վերջին զանգը տոնող 84 սաներից 82-ը հետագա ուսումը շարունակելու նպատակով դիմել են Հայաստանի Հանրապետության և օտարերկրյա բարձրագույն ռազմաուսումնական հաստատություններ:

Իր ելույթում ՀՀ պաշտպանության նախարար Սեյրան Օհանյանը, ջերմորեն ողջունելով և շնորհավորելով ներկաներին, նշել է, որ վարժարանի սաները ցուցաբերել են բարձր առաջադիմություն ու հետաքրքրություն իրենց ընտրած մասնագիտության նկատմամբ: Սեյրան Օհանյանի խոսքերով՝ սաները հարստացնում են վարժարանի պատմությունը: Պաշտպանության նախարարը նաև նկատել է, որ յուրաքանչյուր տարի վարժարանն ավարտող սաներն ակնառու առաջընթաց են գրանցում:

Վերջին զանգի հանդիսավոր արարողությունը եզրափակվել է վարժարանի սաների մասնակցությամբ ցուցադրական ելույթներով և հանդիսավոր քայլերթով: