ԱՊՀ երկրների ինստիտուտի խորհրդաժողովի մասնակիցները սատարել են ԼՂՀ դիրքորոշմանը

Մայիսի 24-ին Մոսկվայում ԱՊՀ երկրների ինստիտուտը, նրա տնօրեն Կոնստանտին Զատուլինի ղեկավարությամբ, անց է կացրել «Կլոր սեղան»՝ «Կովկասին ուղղված ներքին և արտաքին սպասնալիքները Մերձավոր և Միջին Արևելքում առկա ճգնաժամի պայմաններում», որին մասնակցել են տարածաշրջանի ռուս առաջատար փորձագետներ, Լեռնային Ղարաբաղի, Իրանի, Ադրբեջանի, Աբխազիայի դեսպանությունների ներկայացուցիչներ: «Կլոր սեղանի» աշխատանքին ԼՂՀ կողմից մասնակցել են ՌԴ-ում ԼՂՀ մշտական ներկայացուցչության աշխատակիցներ Ռուբեն Զարգարյանը և Արսեն Մելիք-Շահնազարովը: Իր ելույթում Ռուբեն Զարգարյանը վերլուծության է ենթարկել Թուրքիայի կողմից նկատվող սպառնալիքները և նրա սադրած հակամարտությունները տարածաշրջանի երկրների նկատմամբ, Ադրբեջանի տարածքային նկրտումները իր բոլոր հարևանների նկատմամբ և Ադրբեջանի կողմից միջազգային իրավունքի նորմերի ժխտումը: Զեկուցողը հիմնավորել է ԼՂՀ դերն ու նշանակությունը Արևելյան Միջերկրածովյան տարածաշրջանում խաղաղության և կայունության հաստատման գործում, մերկացվել՝ Բաքվի վարչախմբի հակաիրավական փորձերը՝ կասկածի տակ դնելու ԼՂՀ ինքնիշխանությունն ու տարածքային ամբողջականությունը: Ընդգծվել է, որ ԼՂՀ վերջնական ճանաչման ձգձգումը լրջորեն բարդացնում է միջպետական հարաբերությունները, արձանագրվել է, որ միջազգային իրավունքը հրամայաբար պահանջում է ճանաչել ԼՂՀ-ն: Ռուբեն Զարգարյանը ներկայացրել է ԼՂՀ դիրքորոշումը ադրբեջանա-ղարաբաղյան հակամարտության միջազգային-իրավական կարգավորման վերաբերյալ, ինչն ակտիվորեն պաշտպանել են «Կլոր սեղանի» բոլոր մասնակիցները: Լեռնային Ղարաբաղի Հանրապեստության գոյության ժխտման՝ Ադրբեջանի դեսպանության քարոզչական փորձերը մերկացվել են համաժողովի բազմաթիվ մասնակիցների կողմից, ովքեր իրենց ելույթներում ընդգծել են, որ Հարավային Կովկասում կան միջազգային իրավունքի վեց սուբյեկտներ, իսկ ԼՂՀ-ն տարածաշրջանի ամենակայացած և ամենակայուն պետություններից մեկն է: