Ռոդ Այլենդում նշեցին Շուշիի ազատագրման 20-ամյակը

Ռոդ Այլենդ ամերիկյան նահանգի Փրովիդենս մայրաքաղաքում անց է կացվել հանդիսավոր միջոցառում նվիրված Շուշի քաղաքի ազատագրման 20-ամյակին: ԱՄՆ-ում Լեռնային Ղարաբաղի մշտական ներկայացուցչության հաղորդագրության համաձայն միջոցառումը կազմակերպել են ՀՅԴ ԱՄՆ-ի Արևելյան ափի Կենտրոնական հանձնաժողովը, Ռոդ Այլենդի Հայկական մշակութային ասոցիացիան և Փրովիդենսի Ս. Վարդանանց հայկական եկեղեցին: Միջոցառմանը ներկա էին հայկական համայնքի ներկայացուցիչներ և բարձրաստիճան հյուրեր: Դիմելով հավաքվածներին՝ ԱՄՆ-ում և Կանադայում ԼՂՀ մշտական ներկայացուցիչ Ռոբերտ Ավետիսյանը նշեց 1992 թ. Ադրբեջանի կողմից սանձազերծված պատերազմում տարած հաղթանակի նշանակության մասին, վստահություն հայտնելով հետագա կարևոր հաջողությունների վերաբերյալ: Միևնույն ժամանակ նա երախտագիտություն հայտնեց Ռոդ Այլենդի հայկական համայնքին Արցախի՝ որպես ազատ և անկախ երկիր զարգանալու ձգտմանը ցուցաբերած աջակցության համար: Միջոցառմանը ներկա ԱՄՆ-ի կոնգրեսական Դեյվիդ Սիսիլինը, Փրովիդենսի, ՈՒորուիքի և Գրենսթոնի քաղաքագլուխները շնորահավորել են Արցախի ժողովրդին եռատոնի՝ Հայրենական մեծ պատերազմում տարած հաղթանակի օրվա, Շուշիի ազատագրման և ԼՂՀ Պաշտպանության բանակի կազմավորման կապակցությամբ: Տեղի է ունեցել տոնական համերգ: