«168 ժամ». Գագիկ Ծառուկյանն ատրճանակն ուղղել է Հմայակ Հովհաննիսյանի դեմքին, ինչից հետ նա ինքնաբացարկի դիմում է ներկայացրել

«168 Ժամ»–ի տեղեկություններով՝ ԲՀԿ նախագահ Գագիկ Ծառուկյանին մեծ դժվարությամբ է հաջողվել Քաղաքագետների միության նախագահ Հմայակ Հովհաննիսյանից ստանալ ինքնաբացարկի դիմումը:

Թերթը հիշեցնում է, որ մամուլում բազմաթիվ հրապարակումներ եղան այն մասին, թե նախագահ Սերժ Սարգսյանն է պահանջել, որ Հ.Հովհաննիսյանը պատգամավորի մանդատ չստանա: Թերթի աղբյուրների համաձայն, Հ.Հովհաննիսյանը նախ՝ չի համաձայնել մանդատը վայր դնել և դրա համար երկար բացատրություններ է տվել: Ըստ նույն աղբյուրների Գ. Ծառուկյանին ինչ-որ պահի բարկացրել են այդ բացատրությունները, ու նա ատրճանակն ուղղել է Հովհաննիսյանի դեմքին: Դրանից հետո է միայն Հ.Հովհաննիսյանը գրել ինքնաբացարկի դիմումը: Թերթը նշում է, որ Հ.Հովհաննիսյանը երեկ թերթի թղթակցի հետ զրույցում չի փորձել հերքել այս տեղեկությունը: Ընդամենն ասել է, թե ինքը հայտարարություն է տարածել և ավելացնելու ոչինչ չունի:

«Մեկն էլ ինձ հարցնում է, թե Ս.Սարգսյա՞նն է ստիպել, որ ինքնաբացարկ ներկայացնեմ: Ես ասեկոսեները չեմ մեկնաբանում»,- ասել է նա: Իսկ Գ. Ծառուկյանի մամլո խոսնակ Խաչիկ Գալստյանից թերթի թղթակցին չի հաջողվել նշված տեղեկության վերաբերյալ մեկնաբանություն ստանալ, քանի որ նրա հեռախոսն անջատված էր: Ի դեպ, տեղեկություններ կան, թե Ս. Սարգսյանը չի ցանկացել նաև, որ Վարդան Օսկանյանը ես պատգամավորական մանդատ ստանա, սակայն Գ. Ծառուկյանին չի հաջողվել Օսկանյանին համոզել: