Ինչու հենց Թալիշը և ինչ ճակատագիր է սպասվում գերի ընկած ադրբեջանցի զինծառայողին. պարզաբանում է Բաբայանը

Երեկ՝ փետրվարի 1-ին, ժամը 15:00-ի սահմաններում Արցախի սահմանների հյուսիսային (Թալիշ) ուղղությամբ հակառակորդը, օգտագործելով եղանակային մառախլապատ պայմանները, ձեռնարկել է հետախուզա-դիվերսիոն ներթափանցման փորձ:

Արցախի Պաշտպանության նախարարության փոխանցմամբ՝ ՊԲ առաջապահ ուժերը, ժամանակին հավաստանշելով ադրբեջանական հատուկ ջոկատայինների առաջխաղացումը, դիմել են կանխարգելիչ գործողությունների եւ կորուստներ պատճառելով, նրանց հետ շպրտել: Կազմակերպված հակադիվերսիոն գործողության արդյունքում՝ առաջնագիծը պաշտպանող հայկական ուժերին հաջողվել է գերի վերցնել ադրբեջանական բանակի զինծառայող, 1995թ. Բարդա քաղաքում ծնված Էլնուր Հյուսեին Զադեին: Հակառակորդը տվել է նաև առնվազն 1 վիրավոր, որն, ի դեպ, պաշտոնապես հաստատվել է Ադրբեջանի ՊՆ-ի կողմից այսօր տարածված հաղորդագրությամբ:

Գերեվարված զինծառայողի առնչությամբ ադրբեջանական լրատվամիջոցները տարածել են տեղեկություն, թե վերջինս զինվորական կարգապահությունը բազմիցս խախտելու պատճառով վաղուց ազատված է եղել Ադրբեջանի զինված ուժերից:

ԼՈՒՐԵՐ.com-ի հետ զրույցում Արցախի նախագահի մամուլի խոսնակ Դավիթ Բաբայանն ասաց՝ նման երևույթները որևէ իրադարձության հետ կապ չունեն. դա Ադրբեջանի էությունն է, իսկ էությամբ այդ պետությունը դիվերսիոն ու ահաբեկչական է: «Մենք պետք է նաև նկատի ունենանք, որ 2017 թվականը մեզ համար հոբելյանական է, քանի որ տոնելու ենք Շուշիի, Բերձորի ազատագրման 25-ամյակը, իսկ իրենց համար դա հակառակ նշանակությունն ունի. պարտվել են: Նրանք այս տարի փորձելու են այսպիսի դիվերսիոն փորձերով ինքնահանգստանալ: Սա՛ է խնդիրը: Նրանք ունեն հստակ ծրագիր՝ անընդհատ խախտել հրադադարի ռեժիմը. դա իրենց էությունն է: Իհարկե, ակնկալում ենք, որ դիվերսիոն նման փորձեր, հրադադարի խախտումներ՝ էլի են լինելու»,- նշեց Դավիթ Բաբայանը: 

Նրա խոսքով՝ հակառակորդը դիվերսիոն ներթափանցման համար հատուկ է ընտրել Թալիշի ուղղությունը, քանի որ, ինչպես հայտնի է, այնտեղ իրականացվում է վերաբնակեցման լայնածավալ ծրագիր: «Նրանք փորձում են ահաբեկել բնակիչներին: Սա էլ է քաղաքականություն: Մյուս կողմից՝ տեսնում ենք, թե ինչպես է նույն դիվերսիան, ահաբեկչությունը Ադրբեջանը դրսևորում սեփական ժողովրդի նկատմամբ: Նույն գերի ընկած դիվերսանտից ադրբեջանական իշխանությունները, կարծես թե, փորձում են ձերբազատվել, ասելով, որ նա Ադրբեջանի զինված ուժերում չի ծառայում: Այդ դեպքում՝ ո՞վ է նա, կարո՞ղ է՝ եկել է քաղաքական ապաստան խնդրելու: Այս դեպքերը ևս մեկ անգամ ցույց են տալիս, թե մենք ում հետ գործ ունենք: Բայց ինչքան էլ որ փորձեն նման քայլեր կատարել, միշտ էլ ձախողվելու են, մենք պատրաստ ենք ցանկացած պահի կանգնեցնել նրանց դիվերսիոն ու ահաբեկչական փորձերը»,- ընդգծեց Բաբայանը՝ հավելելով, որ Թալիշում վերականգնման նորմալ աշխատանքներ են ընթանում և այս ամենը որևէ ձևով չի կարող ազդեցություն ունենալ: 

Իսկ հակառակորդի գերի ընկած զինվորի հետագա ճակատագրի վերաբերյալ՝ Բաբայանը նշեց՝ մենք մարդասիրական երկիր ենք, գերիի կյանքին որևէ վտանգ չի սպառնում. «Մենք Ադրբեջան չենք, հո չե՞նք սպանելու գերուն: Նրա կյանքին վտանգ չի սպառնում: Մնացածը հետագայում կտեսնենք: Ժամանակը ցույց կտա, թե ինչպես է այդ ամենն ընթանալու»:

Իսկ Արցախի ՊՆ մամուլի խոսնակ Սենոր Հասրաթյանը Ադրբեջանի կողմից տարածված հերքումների վերաբերյալ ֆեյսբուքյան իր էջում գրել է. «Որ ադրբեջանական կողմը յուրաքանչյուր անելանելի վիճակում հայտնվելու դեպքում պատրաստ է հրաժարվել սեփական զինվորից և նրան ներկայացնել նախ՝ դասալիք, իսկ ապա նաև՝ իր զինված ուժերի հետ որևէ կապ չունեցող անձ, հասկանալի է և լրիվությամբ տեղավորվում է ադրբեջանական տրամաբանության մեջ: Սակայն անտրամաբանական ու նաև անհասկանալի է, թե ինչպես կարող է բանակից զորացրված զինծառայողը՝ զինվորականի համազգեստով, սպառազինված ու առավել ևս՝ դիվերսիոն խմբի կազմում ներթափանցել հակամարտ զորքերի միջդիրքային տարածք, փորձել կատարել հատուկ նշանակության գործողություն և արդյունքում՝ հայտնվել հայերի ձեռքում… Ահա և ձեզ ադրբեջանական մտածելակերպ»: 

Ի դեպ՝ ԵԱՀԿ Մինսկի խմբի եռանախագահներն առաջարկել են Հայաստանի և Ադրբեջանի արտաքին գործերի նախարարներին հանդիպել Մյունխենի անվտանգության կոնֆերանսի նախաշեմին: Այս մասին հայտարարել է Հայաստանի Հանրապետության արտաքին գործերի նախարար Էդվարդ Նալբանդյանը:

«Եռանախագահներն առաջարկել են Հայաստանի արտգործնախարարությանը՝ հանդիպել Մյունխենի անվտանգության կոնֆերանսի նախաշեմին: Առաջարկ է հնչել նաև հանդիպում կազմակերպել Հայաստանի և Ադրբեջանի արտգործնախարարների միջև: Մենք, իհարկե, երբևէ չենք հրաժարվում որևէ հանդիպումից: Բայց ինչ վերաբերում է Ադրբեջանի նախարարի հետ հանդիպմանը, այս պահին չեմ կարող հաստատել»,- նշել է Նալբանդյանը՝ ընդգծելով, որ հայտնի չէ, թե այս անգամ ինչ խաղեր կարող է տալ Ադրբեջանը:

Քրիստինա Աղալարյան