Այսօր տեղի կունենա Կաննի միջազգային կինոփառատոնի փակման հանդիսավոր արարողությունը

Այսօր տեղի կունենա Կաննի հոբելյանական 65-րդ միջազգային կինոփառատոնի փակման հանդիսավոր արարողությունը։

Կաննի 65-րդ փառատոնի ժյուրիի անդամներն էին՝ դերասաններ Դայան Քրյուգերը, Էվան ՄաքԳրեգորը, Հիամ Աբասը, Էմանուել Դևոն, ռեժիսորներ Ալեքսանդր Փեյնը, Ռաուլ Փեկը, Անդրեա Արնոլդը, մոդելյոր Ժան–Պոլ Գոտյեն։ Ժյուրիի նախագահն է իտալացի Նանի Մորետին:

Կինոփառատոնը բացվեց ամերիկացի ռեժիսոր Ուես Անդերսոնի «Լիալուսնի թագավորությունը» (Moonrise Kingdom) դրամայով: Այսօր, որպես փակման ֆիլմ կցուցադրվի Քլոդ Միլերի «Թերեզա Դեսկեյլու»-ն։

«Ոսկե արմավենու ճյուղին» հավակնում է 22 ֆիլմ, սակայն նախապես ներկայացված է եղել 4300 կինոնկար: Կինոստուգատեսի ընթացքում ներկայացվել է 91 ֆիլմ 30 երկրից:

Մեքսիկացի ռեժիսոր Միշել Ֆրանկոյի «Լուսիայից հետո» (Despues de Lucia) ֆիլմը երեկ ստացել է «Հատուկ հայացք» ծրագրի գլխավոր մրցանակը: 

Ժյուրիի հատուկ մրցանակին են արժանացել Բենուա Դելեպինն ու Գուստավ Կերվերնը՝ «Հեղափոխություն» (Le Grand Soir) ֆիլմի համար: 

Կնոջ լավագույն դերի համար «Հատուկ հայացք» մրցանակին են արժանացել երկու դերասանուհի՝ Սյուզաննա Կեմանը՝ «Ամեն դեպքում՝ Լոուրենսը» (Laurence Anyways) ֆիլմի և Էմիլի Դեկիենը՝ «Բանականության կորուստ»  (Perdre la Raison) ֆիլմի համար: 

Այս տարի տղամարդու լավագույն դերի համար մրցանակ որոշվել է չշնորհել: 

Ժյուրիի հատուկ հիշատակմանն է արժանացել Աիդա Բեգիչը՝ «Երեխաները Սարաևոյից» (Children of Sarajevo) ֆիլմի համար: