The New York Times. Վերադառնալ հնարավոր է, բայց «գրավել»՝ ո՛չ

«Wall Street»-ի ցուցարարներին Նյու Յորքի ոստիկանությունը թույլատրել է առանց վրանների և քնապարկերի վերադառնալ «Զուկոտի» կոչվող քաղաքային այգին։ Նախօրեին ցուցարարները բառացիորեն ավերել էին այգին, որտեղ ոստիկանությունն ավելի քան երկու հարյուր մարդ էր ձերբակալել անկարգություններ հրահրելու և հասարակական կարգը խախտելու համար։ Նյու Յորքի դատավորներից մեկը հայտարարել է, որ վրանային հանրահավաքները և ցույցերը քաղաքային այգում անցկացնելն անթույլատրելի է։

Ցուցարարների փաստաբանն ասել է, որ «այդ գործողությունները (բողոքի ակցիաները) անցկացվում են ոչ միայն ԱՄՆ–ում, այլ նաև աշխարհի շատ երկրներում և ցուցարարների նպատակը ոչ թե վրանային ճամբարներ ստեղծելն է, այլ ազատության համար պայքարը»։ 

Քաղաքային իշխանությունները հայտարարել են, որ բնակիչներից ստացել են հարյուրավոր դիմում–բողոքներ։ Մասնավորապես բողոքել են մոտակա տների բնակիչները, ովքեր դժգոհել են բարձր աղմուկից, հակասանիտարական պայմաններից և հանցագործություններից։ Ցուցարարներն, այնուամենայնիվ, հայտարարել են, որ չեն պատրաստվում հանձնվել և շարունակելու են իրենց պայքարը։ «Մենք կարող ենք զբաղեցնել ցանկացած տարածք քաղաքի տարբեր մասերում կամ էլ շարունակելու ենք մեր պայքարը հենց այս այգում»,– ասել ցուցարարներից մեկը։ Քանի դեռ «Զուկոտի» այգին փակ է, քաղաքային իշխանությունները կազմակերպել են այգում սանիտարական վիճակը վերականգնելու աշխատանքները։