Հնագետները հնեցրել են երաժշտական հնագույն գործիքները

Հնագետները ևս մի անգամ թվագրել են Գայսենքլոսթեռլե (Geißenklösterle) քարանձավում հայտնաբերված հնագիտական գտածոները և պարզել են, որ դրանք ավելի հին են, քան նախապես ենթադրվել է։ Հնագիտական իրերի մեջ են նաև մինչև օրս հնագույնը համարվող երաժշտական գործիքները՝ օրինակ մամոնտի ժանիքից պատրասված ֆլեյտան։ Գիտնականների եզրակացություններն ամփոփված են Journal of Human Evolution պարբերականում, իսկ դրա համառոտ բովանդակությունը հաղորդում է Թյուբինգենի համալսարանի մամուլի հրապարակումը։

Նոր մոտեցման շրջանակներում գիտնականները կիրառել են օրգանական մնացորդների, այդ թվում՝ ոսկորների, թվագրման նոր տեխնոլոգիան, որի էությունը շարակցական հյուսվածքների հիմք հանդիսացող կոլագեն սպիտակուցի առկայությամբ պայմանավորված հնարավոր բոլոր աղտոտումների բացառումն է։

Այս մեթոդի օգնությամբ կարողացան պարզվել, որ գտածոների տարիքը կազմում է 40-43 հազար տարի, ինչը 2-3 հազար տարով ավելին է նախկին գնահատականներից։ Այս մեթոդները, ըստ գիտնականների, առանցքային դեր են խաղում հնագույն ժամանակագրության և տարբեր վարկածների ստուգման գործում։

Հետազոտողները գտնում են, որ նոր արդյունքները ստիպում են վերանայել այսպես կոչված Օրինյակ մշակույթի ծագման ժամանակը։ Եվրոպայի տարածքում ուշ պալեոլիթի սկզբին ծագած այս մշակույթը առավելապես հայտնի է իր կերպարվեստով և երաժշտական գործիքներով։ Հատկանշական է, որ հետազոտության մեթոդը օգնել է հաստատել ավելի վաղ հայտնված այն տեսակետն առ այն, որ Դունայի ավազանը հանդիսանում է այս մշակույթի ծագման և կազմավորման շրջանը։