Ավելի ակտիվորեն են սկսելու խախտել հրադադարի ռեժիմը, ինչպես և կանխատեսվում էր. Բաբայան

Վերջին շրջանում Արցախի և Ադրբեջանի սահմանին լարվածությունն աճել է: Դրան զուգահեռ՝ ադրբեջանական քարոզչությունը պետական գերատեսչության մակարդակով ամեն օր հայտարարություն է տարածում, իբր հայկական կողմը դիվերսիոն ներթափանցման փորձ է կատարել, իսկ իրենք «հետ են շպրտել հակառակորդին՝ պատճառելով կորուստներ»:

Հայտարարություններին կից՝ ներկայացվում է նաև անհասկանալի տեսանյութեր, իբր կատարված գործողություններից: Այսօր ևս Ադրբեջանի ՊՆ-ն հայտնել է, իբր՝ «հայկական ստորաբաժանումները փորձել են դիվերսիա կազմակերպել Թալիշի և Գյուլիստանի դիրքերի ուղղությամբ, սակայն ադրբեջանական զինուժը ՊՆ ղեկավար Զաքիր Հասանովի հրամանատարությամբ՝ կանխել է այն»: Իհարկե, հայկական կողմից հերքվում են նման ապատեղեկատվությունները, քանի որ իրականությունը լրիվ այլ է:

ԼՈւՐԵՐ.com-ի հետ զրույցում Արցախի նախագահի մամուլի խոսնակ Դավիթ Բաբայանը ադրբեջանական կողմի տարածած հերյուրանքները մեկնաբանում է հետևյալ կերպ. «Դա պայմանավորված է նրանով, որ ադրբեջանական կողմն է դիվերսիոն գործողություններ կատարում: Այսօր տարածված ապատեղեկատվությանն ավելացել էր նաև այն, որ իրենց Պաշտպանության նախարարը ևս, իբր, մասնակցել էր գործողությանը: Սա նշանակում է, որ մենք գործ ունենք ոչ թե Պաշտպանության նախարարի, այլ ավազակապետի հետ, որը նույնպես փորձում է մասնակցել գործընթացներին: Իհարկե, սա PR է, նա երբեք չի մասնակցել առաջին գծում որևէ գործողությունների»: 

Բաբայանի խոսքով՝ ինչպես և կանխատեսվում էր, Մեհրիբան Ալիևայի՝ Ադրբեջանի առաջին փոխնախագահ նշանակվելուց հետո ադրբեջանցիներն ավելի ակտիվորեն են սկսելու խախտել հրադադրի ռեժիմը: «Դրա համար կա մի քանի պատճառ: Նախ և առաջ, բնակչության մի մաս կա, որը դժգոհ է ու սա համարում է խայտառակություն, օրենքների խախտում: Ադրբեջանի նախագահը, որպեսզի բնակչության այդ հատվածի ուշադրությունը շեղի, ցույց տա, որ ինքը կնոջ կրունկի տակ չէ, նրա կամակատարը չէ, հայտարարում է. «հայերը հարձակվում են, մենք էլ պատասխան ենք տալիս, ես Մեհրիբանի ազդեցության տակ չեմ, ինքս եմ որոշումներ կայացնում» և այլն: Կան սուբյեկտիվ ու օբյեկտիվ պատճառներ, որոնք բխում են Ադրբեջանի ահաբեկչական էությունից: Այս բոլոր գործոնները ինչ-որ ձևով համընկել են»,- ասաց Բաբայանը և հավելեց՝ պետք է հաշվի առնել, որ առաջիկայում նրանք հիշատակելու են Խոջալուի դեպքերը, դրա համար պետք է ցույց տան, որ հայերը ագրեսիվ են: 

Մեր զրուցակիցը շեշտեց, որ ադրբեջանական կողմի բոլոր գործողությունները կանխվում են. «Կանխելու հետ մեկտեղ՝ մենք հայտարարություններով պետք է ցույց տանք, որ նման դեպք է եղել, որը կանխվել է: Մենք պետք է ուժեղ լինենք ու ցանկացած պահի այնպիսի հակահարված տանք, որ միշտ հիշեն»: