Ընտրակաշառք վերցնել մեկից, քվեն տալ մյուսին

ԼՈւՐԵՐ.com-ի հարցազրույցն՝  ԱԺ Պետաիրավական հարցերի հանձնաժողովի նախագահ Հովհաննես Սահակյանի հետ.

-Պարո՛ն Սահակյան, կա տեղեկատվություն այն մասին, որ Ձեզ է վստահվելու Լոռու մարզպետի պաշտոնը: Նախագահ Սերժ Սարգսյանի հետ նման քննարկում ունեցե՞լ եք:

 -Սերժ Սարգսյանի հետ հանդիպումներ և քննարկումներ եղել են, բայց Լոռու մարզպետի պաշտոնում ինձ նշանակելու հետ կապված որևէ քննարկում տեղի չի ունեցել: Ես այդ լուրերը համարում եմ անհեթեթություն:

-Ապրիլին կայանալիք խորհրդարանական ընտրություններն ու տարածքային ընտրացուցակները  Ձեր կուսակից ընկերների համար դարձել են  վեճերի և կռիվների առարկա: Ի՞նչ չեն կիսում «հանրապետականները»:

-Չեմ կարծում, որ կռիվ է եղել:

-Ամենաթարմը ՀՀԿ-ական պատգամավորներ Մուրադ Մուրադյանի և Արայիկ Գրիգորյանի թիմակիցների միջև տեղի ունեցած ծեծկռտուքն էր: Սա կռիվ չէ՞ր:

-Մուրադ Մուրադյանն ու Արայիկ Գրիգորյանը նշում են, որ աշխատում են մեր թիմի համար: Եթե երիտասարդների միջև խոսք ու զրույց էլ կա, դա դեռ չի նշանակում, որ տարածքային ընտրացուցակների մեջ կա խնդիր: 

-Իրար տարածքներ մտնելու, խցկվելու սահմանափակում չկա՞ դրված:

-«Հանրապետական» կուսակցության քաղաքական  թիմը միահամուռ է ընտրություններին: Մենք բոլորս համախմբված ենք կուսակցության ղեկավար Սերժ Սարգսյանի շուրջ: Մեր բոլորիս նպատակը մեկն է՝ անել ամեն բան, որ մեր քաղաքական թիմը հաղթի: 

-Ամեն ինչ անելու ֆոնին շատ են նաև ընտրակաշառնքեր բաժանելու մասին լուրերը:

-Այդ մասին միայն խոսվում է: Երբ կլինեն փաստեր, նոր կխոսենք:

-Հրապարակումները բազմաթիվ են: Փաստե՞ր  եք ուզում տեսնել:

-Երբ մենք աշխատում էինք ԱԺ-ում և մեր հանձնաժողովում քննարկում էր ԸՕ-ը, դրանում ներդրվեցին այնպիսի մեխանիզմներ, որոնք բացառում են վերահսկողությունն այն պահին, երբ քաղաքացին կմտնի քվեախուց: Սրան զուգահեռ՝ կան վերահսկողական մեխանիզմներ՝ քվեախցիկից դուրս՝ իրավիճակը վերահսկելու համար: 

-Այո՛, ընտրատարածքներում ընտրակեղծիքների դիմելու շանսերը գրեթե զրոյական են, և դա է պատճառը, որ կուսակցությունները փորձում են ընտրատեղամասերից դուրս ձայներ հավաքագրել՝ մասնավորապես լայն տարածում գտած ընտրակաշառքների միջոցով:

-Ենթադրենք՝ մեկ ընտրողին մոտենում է տվյալ տարածքից 30 թեկնածու, երեսունին էլ կարող է ասել՝ այո՛, քեզ կընտրեմ, բայց հանգիստ կարող է  մտնել քվեախցիկ և այլ մարդու ընտրել,  իր քվեն տա  նրան, ում ինքն է ուզում: Ես նորից եմ ասում՝ քաղաքացու քվեն չի վերահսկվում: 

Հարցազրույցն Աղավնի Սուքիասյանի