ՀԱԷԿ-ի հատուկ հրշեջ ջոկատը վերազինվում է

Օրերս ՀՀ ԱԻՆ ՀԱԷԿ-ի հատուկ հրշեջ ջոկատը ստացել է նոր, «Պրոֆի» տիպի շնչառական ապարատներ, որոնք փոխարինելու են արդեն հնացած թթվածնային մեկուսիչ հակագազերին:

Հին նմուշի հակագազերն աշխատում էին մեկուսացված, փակ ցիկլով՝ զտելով հրշեջի արտաշնչած օդը ու նորից այն ուղղելով շնչուղիներ: Խափանման դեպքում սա կարող է մարդու համար ճակատագրական լինել, բացի այդ՝ թթվածին առավել վտանգավոր է, քանի որ հեշտ է բռնկվում:

Նոր շնչառական ապարատները, որոնք լայն կիրառություն ունեն աշխարհի շատ երկրներում, աշխատում են խտացված օդով և հնարավորություն են տալիս հրշեջին մեկ ժամ աշխատել ծխապատ գոտում: Արտաշնչած օդը դուրս է մղվում, ինչը կարևոր է հրշեջի անվտանգություն ապահովելու համար: Եվս մեկ առավելություն է այն, որ ապարատն ունի լրացուցիչ խողովակ, որի միջոցով հրշեջը կարող է իր բալոնից օդ մատակարարել մարտական ընկերոջն ու օգնել նրան դուրս գալու վտանգավոր գոտուց:

ՀԱԷԿ-ի հատուկ հրշեջ ջոկատի հրամանատար, փ/ծ փոխգնդապետ Հովհաննես Մարգարյանի խոսքերով՝ ջոկատում առկա հակագազերն արդեն մաշվել էին թե ֆիզիկապես, թե բարոյապես: «Այդ հակագազերից վերջինը ստացել էինք ավելի քան 20 տարի առաջ: Ու քանի որ մյուս երկրներում դրանք արդեն հանվել են արտադրությունից ու շահագործումից, զգալիորեն դժվարացել էր դրանց վերանորոգումը՝ պահեստային մասերի բացակայության պատճառով: Թթվածնային մեկուսիչ հակագազերի օգտագործումն օրեցօր ավելի վտանգավոր էր դառնում անձնակազմի համար ու կարող էր բացասաբար անդրադառնալ հրդեհաշիջման ընթացքի վրա: Նոր հանդերձանքն ու շնչառական ապարատները հնարավորություն են տալիս բարձրացնել աձնակազմի պատրաստվածությունն ու ավելի արդյունավետ դարձնում հրդեհաշիջման աշխատանքների կազմակերպումը», - ասել է Մարգարյանը:

Շնչառական ապարատներից բացի՝ ջոկատի անձնակազմն ապահովվել է նոր մարտական համազգեստով (ջերմակայուն հագուստ, ճտքավոր կոշիկներ, սաղավարտ, ձեռնոցներ) և ջերմաանդրադարձիչ հանդերձանքով, որը թույլ է տալիս աշխատել չափազանց բարձր ջերմաստիճանի պայմաններում: Մոտ մեկ տարի առաջ ջոկատը ստացել է նաև բոլորովին նոր՝ 2010 թ. արտադրության, 5 տոննա ջրատարողությամբ «ԿԱՄԱԶ» մակնիշի հրշեջ մեքենաներ:

ՀԱԷԿ-ի հատուկ հրշեջ ջոկատը շնչառական նոր սարքավորումները կսկսի կիրառել ՀՀ ԱԻՆ ճգնաժամային կառավարման ակադեմիայի մասնագետների կողմից անցկացվող տեսական ու գործնական դասընթացներում վերապատրաստվելուց հետո: