Facebook-ի բաժնետոմսերի արժեքն ընկել է 30 դոլարից

Երեքշաբթի, մայիսի 29-ին, վաճառքի սկզբից հետո առաջին անգամ Facebook սոցցանցնի բաժնետոմսերի արժեքն ընկել է 30 դոլարից, հաղորդում է Associated Press-ը։

Nasdaq բորսայում տեղի ունեցած վաճառքի արդյունքներով, Facebook-ի արժեթղթի գինը կանգ է առել 28.84 դոլար նիշի վրա։ Նախորդ վաճառասեսիայի համեմատությամբ, դրանք էժանացել են 3.07 դոլարով (9.6%)։ Մայիսի 18-ից ի վեր, երբ ընկերությունը մուտք գործեց բորսա, դրա արժեթղերը կորցրեցին իրենց գնի 24%-ը։

Facebook-ի արժեթղթերի մեկնարկային գինը 38 դոլար էր։ Վաճառքի արդյունքում հնարավոր եղավ ներգրավել ավելի քան 16 միլիարդ դոլար։ Սոցիալական ողջ ցանցը գնահատվում էր 104 միլիարդ դոլար, մինչդեռ արդեն երկրորդ օրը դրա գինն ընկավ մեկնարկային արժեքից։

Facebook-ի մուտքը բորսա ուղեկցվել է մի շարք անախորժություններով։ Սկզբում դրանց վաճառքի մեկնարկը կես ժամով ուշացվել էր Nasdaq-ում տեխնիկական անսարքությունների հետևանքով, ապա ինֆորմացիա էր հայտնվել, թե բանկերը նվազեցրել են ընկերության տարեկան եկամուտի սպասվող գնահատականը, սակայն այդ լուրը հայտնել են միայն ընտրյալ հաճախորդներին։

Տեղի ունեցածի հետաքննությունն իրականանցնում են ԱՄՆ սենատի ֆինանսական ծառայությունների կոմիտեն և բանկային կոմիտեն։