Թուրքիայի քեմալական կուսակցությունը չեղյալ է համարել արտերկրում նախատեսված միջոցառումները

Թուրքիայի ընդդիմադիր քեմալական Հանրապետական ժողովրդական կուսակցությունը որոշում է կայացրել չեղյալ հայտարարել սահմանադրական հանրաքվեի քարոզարշավի շրջանակում արտերկրում նախատեսված բոլոր միջոցառումները: Ինչպես հաղորդում է թուրքական «Հուրիեթ» պարբերականը, այս մասին հայտնել է կուսակցության փոխնախագահ Թեքին Բինգյոլը:

Կուսակցության առաջնորդ Քեմալ Քըլըչդարօղլուն հանդես է եկել հայտարարությամբ' կապված Նիդերլանդների կողմից Թուրքիայի արտգործնախարարի ինքնաթիռի վայրէջքն արգելելու որոշման հետ: Քըլըչդարօղլուն դատապարտել է նման քայլը' ասելով, թե «ժողովրդավարությունը պաշտպանողներն այդպես չեն կարող վարվել»:

Նիդերլանդները հետ է կանչել թույլտվությունը Թուրքիայի արտաքին գործերի նախարար Մևլութ Չավուշօղլուին տեղափոխող ինքնաթիռի վայրէջքի համար: Նիդերլանդների կառավարությունը հայտնել է, որ նման քայլի են դիմել, քանի որ Չավուշօղլուի այցը Ռոտերդամ «ռիսկի տակ էր առնում հասարակական կարգն ու անվտանգությունը»:

Մարտի 11-ին Չավուշօղլուն սպառնացել էր Նիդերլանդներին' ասելով, որ եթե իր թռիչքի թույլտվությունը չեղարկվի, իրենց կդիմեն պատժամիջոցների կիրառմանը: Նա երկրի կառավարության գործելաոճը «ֆաշիստական մոտեցում» էր որակել: Արտգործնախարարն ընդգծել էր, որ սահմանադրական հանրաքվեի քարոզարշավի շրջանակում թուրք գործիչների ելույթները Գերմանիայում և Նիդերլանդներում արգելելով Եվրոպան «բռնում է «ոչ»-ի կողմը»:

Ավելի վաղ հայտնի էր դարձել, որ Նիդերլանդների Ռոտերդամ քաղաքում չեղյալ էր համարվել Թուրքիայի արտաքին գործերի նախարար Մևլութ Չավուշօղլուի միջոցառումը, որը պետք է տեղի ունենար Թուրքիայում նախատեսվող սահմանադրական հանրաքվեի քարոզարշավի շրջանակում: Համաձայն քաղաքապետի գրության' այն սրահի սեփականատերը, որտեղ պետք է ելույթ ունենար Չավուշօղլուն, հրաժարվել է տարածքը տրամադրելուց: