Ակնկալում եմ, որ ընտրությունների գնահատականները կլինեն ավելի կոշտ. Վլադիմիր Կարապետյանը՝ Քլինթոնի այցի մասին

ՀԱԿ արտաքին հարաբերությունների հանձնաժողովի ներկայացուցիչ Վլադիմիր Կարապետյանը Լուրեր.com–ի հետ զրույցում կարևորեց Հիլարի Քլինթոնի այցը և Միացյալ նահանգների շարունակական հետաքրքրությունը տարածաշրջանի նկատմամբ։

«Ակնկալում եմ, որ նա առաջին հերթին կխոսի Հայաստանում ժողովրդավարական գործընթացների մասին, իր ելույթում կբարձրաձայնի այն խնդիրներն ու մարտահրավերները, որոնց մենք հանդիպեցինք վերջին ընտրությունների ընթացքում։ Նաև ակնկալում եմ, որ ընտրությունների գնահատականները (եթե հրապարակային չլինեն՝ գոնե երկկողմ հանդիպումներում ընթացքում) լինեն ավելի կոշտ, քան Եվրոպայի խորհրդի մոնիտորինգի հանձնաժողովի կողմից տրված գնահատականները», – նշեց նա։

Կարապետյանի համոզմամբ՝ դա կնպաստի Հայաստանում ժողովրդավարության հետագա զարգացմանը, ինչպես նաև՝ առաջիկա ընտրությունների անհամեմատ ավելի ազատ և արդար անցկացմանը, ինչի մեջ շահագրգռված է ոչ միայն մեր ժողովուրդը, այլև մեր հարևան և բարեկամ ժողովուրդները։

Նշենք. որ ԱԳՆ հաղորդագրության համաձայն՝ Երևանում կայանալիք բանակցությունների օրակարգում, ի թիվս այլ հարցերի, լինելու է նաև Լեռնային Ղարաբաղի խաղաղ կարգավորման գործընթացի քննարկումը:

Հատկանշական է, որ օրերս հրապարակված ԱՄՆ պետդեպարտամենտի զեկույցում տեղ էր գտել հետևյալ նախադասությունը, թե «Էթնիկապես հայ անջատողականները Հայաստանի աջակցությամբ շարունակում են վերահսկել ադրբեջանական Լեռնային Ղարաբաղ շրջանը և հարակից 7 ադրբեջանական շրջանները»։

Այդ կապակցությամբ վերլուծաբանները մտահոգություն են հայտնում, թե նման դիրքորոշումը կարող է իր արտահայտությունը գտնել նաև Քլինթոնի դիրքորոշման մեջ ԼՂ հակամարտության կարգավորման հարցում։

«Իրավական առումով՝ ես չեմ համարում, որ մենք որևէ խնդիր ունենք։ Մենք էլ ասում ենք, որ սա ինքնորոշման հարց է, և Ղարաբաղի հակամարտության կարգավորումը մենք դիտարկում ենք հենց ինքնորոշման շրջանակներում», – նշեց Կարապետյանը՝ պատասխանելով հարցին, թե կիսո՞ւմ է արդյոք վերոնշյալ մտահոգությունը։

Վերջինս կարծում է, որ եթե մեր իշխանությունները պաշտպանելիս լինեն Հայաստանի շահերը, ասուլիսի կամ երկկողմ շփման ժամանակ պետք է այս հարցը բարձրացնեն, թե, այնուամենայնիվ, ինչո՞ւ պետդեպի զեկույցում տեղ գտավ այդ նախադասությունը։

Ինքը՝ Կարապետյանը, տեսակետ հայտնեց, որ դա մեր իշխանությունների և դիվանագիտական կորպուսի ոչ լիարժեք գործունեության արդյուքն է, երբ նման ձևակերպումներ են ի հայտ գալիս։ «Մենք պետք է ավելի ակտիվ լինենք, մենք պետք է մեր դիրքորոշումն ավելի հասկանալի կերպով հասցնենք բոլոր մայրաքաղաքներին՝ այդ թվում Միացյալ նահանգների», – եզրափակեց նա։

Հիշեցնենք, որ Քլինթոնը պետական այցով կժամանանի Այսրկովկաս և մայիսի 31-ից հունիսի 7-ն ընկած ժամանակահատվածում, ի թիվս այլ երկրների, կայցելի նաև Հայաստան, Վրաստան և Ադրբեջան:

Այցի ընթացքում ԱՄՆ պետքարտուղարը հանդիպումներ կունենա Սերժ Սարգսյանի, պաշտոնյաների և քաղաքացիական հասարակության ղեկավարների հետ: Այսրկովկասյան այցից հետո Քլինթոնը կմեկնի Թուրքիա։