«Թեղուտի հանքի պաշտպաններն»՝ ընդդեմ «Բնության հաշվեհարդար» ֆիլմի

Երեկ՝ մայիսի 29-ին Վանաձորում ստեղծված «Թեղուտի հանքի պաշտպաններ» հասարակական կազմակերպությունն իր անդրանիկ նիստում դատապարտել է «Թեղուտի պաշտպանության նախաձեռնության» և Թեհմինե Ենոքյանի «Բնության հաշվեհարդար» ֆիլմը։ Նորահայտ կազմակերպությունը, որի առաջին նիստին մասնակցում էին մոտ 30 լոռեցի երիտասարդներ, տարածել է հաղորդագրություն, որում ասվում է.

«Կազմակերպության նպատակն է կանխարգելել Թեղուտի հանքի վերաբերյալ հասարակությանը հրամցվող տեղեկատվությունը եւ ջրի երես հանել Թեղուտի հանքի շահագործման դեմ պայքարող երիտասարդների թիկունքում գտնվող ուժերին:

Որպես նորաաստեղծ կազմակերպության առաջին անելիք նպատակահարմար ենք գտնում հայտնել հասարակությանը, որ ինքնահռչակ կինոռեժիսոր Թեհմինե Ենոքյանի' վերջին օրերին համացանցում մեծ աղմուկ հանած «Բնության հաշվեհարդար» ֆիլմում Թեղուտի մասին տեղ գտած փաստերը, մեղմ ասած, հերյուրանքներ են: Կոչ ենք անում ֆիլմի ստեղծողներին ներողություն խնդրել լոռեցի երիտասարդներից գոյություն չունեցող փաստերն այդքան ամոթալի տեսքով, որպես ճշմարտություն, ներկայացնելու համար:

Հայտնում ենք, որ վերոնշյալ պահանջը չկատարելու դեպքում ստիպված կլինենք դիմել օրենքով չարգելված այլ միջոցների: Օգտվելով առիթից խորհուրդ ենք տալիս երեւանցի երիտասարդներին քիթները չմտցնել Լոռվա հարցերի մեջ եւ զբաղվել սեփական քաղաքի խնդիրներով:

Պահանջում ենք նաեւ շտապ ջնջել ֆիլմը համացանցից»։

Հիշեցնենք, որ լրագրող Թեհմինե Ենոքյանի «Բնության հաշվեհարդար» ֆիլմը, որն օրեր առաջ հանրությանը ներկայացվեց Մաշտոցի պուրակում, պատմում է Հայաստանի հանքարդյունաբերության օջախներում գտնվող բնակավայրերում, մասնավորապես՝ Քաջարան և Լեռնիկ գյուղերում մարդկանց առողջության վրա շրջակա միջավայրի աղտոտվածության ազդեցությունների մասին։ Ֆիլմում ներկայացված են իրական պատմություններ և մարդիկ։