Մոսկվայում լույս է տեսել Թամարա Վարդանյանի «ԱԴՐԲԵՋԱՆՑԻՆԵՐ. Մի անավարտ էթնիկ նախագծի պատմություն. Պատմա-ազգաբանական ակնարկ» աշխատությունը

Մոսկովյան «Ռուսկայա պանորամա» հրատարակչությունում՝ «Կովկասյան հետազոտություններ» շարքի շրջանակներում, լույս է տեսել պատմական գիտությունների թեկնածու Թամարա Վարդանյանի «ԱԴՐԲԵՋԱՆՑԻՆԵՐ. մի անավարտ էթնիկ նախագծի պատմություն (պատմա-ազգաբանական ակնարկ)» գիրքը՝ ռուսերեն լեզվով։ Աշխատության գիտական խմբագիր և նախաբանի հեղինակն է՝ քաղաքական գիտությունների դոկտոր Արմեն Այվազյանը, գրախոսներն են՝ փիլիսոփայական գիտությունների թեկնածու՝ Արթուր Ցուցիևը (Վլադիկավկազ, ՌԴ) և հումանիտար գիտությունների դոկտոր՝ Ռասա Չեպայտենեն (Վիլնյուս, Լիտվա)։ Գիրքը տպագրության է երաշխավորվել Սևծովյան-Կասպյան տարածաշրջանի քաղաքական և սոցիալական հետազոտությունների ինստիտուտի գիտական խորհրդի որոշմամբ (ղեկավար՝ պրոֆեսոր Վլադիմիր Զախարով)։

Թ. Վարդանյանը համակողմանի վերլուծության է ենթարկել ադրբեջանցի ու որոշ արևմտյան հեղինակների կողմից անվերապահորեն կիրառվող մի շարք պատմա-ազգաբանական հասկացությունների («ադրբեջանական էթնոս», «էթնիկ ադրբեջանցի», «ադրբեջանցիների էթնիկ տարածք») գիտական հիմնավորվածության հարցը։ Լայնորեն շրջանառվող այս ձևակերպումներն արդյո՞ք ունեն հստակ ուրվագիծ և բովանդակություն։ Որքանո՞վ է լեգիտիմ դրանց կիրառումն ընդհանրապես, ու գիտապատմական գրականության մեջ՝ մասնավորապես։ Արդյո՞ք կարելի է ադրբեջանական էթնոսի կառուցակցումը ներկայումս համարել ավարտված, թե՞ ոչ։

Այս և հարակից այլ հարցերին պատասխանելու նպատակով հեղինակը հետազոտության է ենթարկել Այսրկովկասի մահմեդականության շրջանում ինքնանույնականացման հիմնական կերպերը, նախաէնդոէթնոնիմերը և նախաէկզոէթնոնիմերը, էթնիկացման գործընթացին նպաստող արտաքին և ներքին գործոնները, էթնիկ ինքնագիտակցության առաջին դրսևորումները, ինչպես նաև դեգերող ինքնության զարգացման հնարավոր ուղիները միջնաժամկետ կտրվածքով։

Գիրքը նախատեսված է պատմաբանների, քաղաքագետների, ազգագրագետների, արևելագետների, սոցիոլոգների, ինչպես նաև ընթերցողների լայն շրջանակների համար։