«Հայկական Ժամանակ». ԵՊԼՀ–ի ռեկտորի թափուր պաշտոնի մրցույթին մասնակցելու համար որևէ դիմում դեռևս չի ստացվել

Երևանի Վ. Բրյուսովի անվան պետական լեզվաբանական համալսարանի ռեկտորի թափուր պաշտոնի մրցույթին մասնակցելու համար ՀՀ կրթության և գիտության նախարարություն որևէ դիմում դեռևս չի ստացվել՝ երեկ թերթի թղթակցին հայտնել է ԿԳՆ հասարակայնության հետ կապերի և տեղեկատվության վարչության պետ Արթուր Բաղդասարյանը: Թերթը նշում է, որ թափուր պաշտոնի մրցույթ հայտարարվել էր այն բանից հետո, երբ ԿԳ նախարար Արմեն Աշոտյանի հրամանով՝ այդ բուհի ռեկտոր Սուրեն Զոլյանն ազատվել էր զբաղեցրած պաշտոնից, իսկ նոր թեկնածուների դիմումների ընդունման ժամկետ էր սահմանվել մայիսի 2-ից մինչև հունիսի 1-ը: Ուշագրավ է, որ այս ընթացքում ոչ միայն ոչ ոք դիմում չի ներկայացրել, այլևս չեն քննարկվում Լեզվաբանական համալսարանի ռեկտորի պաշտոնին հավակնողների անուններ: Ի դեպ, որոշ ժամանակ խոսվեց Սերժ Սարգսյանի եղբոր՝ ԵՊՀ աստվածաբանության ֆակուլտետի Հայ եկեղեցու պատմության ամբիոնի վարիչ Լևոն Սարգսյանի մասին, սակայն վերջինս, ըստ որոշ տեղեկությունների, շտապել է հերքել այդ լուրերը: Լեզվաբանական համալսարանի ռեկտորի թափուր պաշտոնի մրցույթը նախատեսված է հունիսի 12-ին: