«Հրապարակ». Զորանոցային կարգուկանոն ՀՀԿ–ում

ՀՀԿ ԳՄ նիստը երեկ շատ կարճ է տևել, նոն-ստոպ տարբերակով շատ արագ Սերժ Սարգսյանը ներկայացրել է Աժ ղեկավար կազմը, հանձնաժողովների ՀՀԿ ղեկավարներին, և իջել են ներքև՝ դահլիճում ՀՀԿ խորհրդի նիստը շարունակելու: Խորհրդի անդամներին Սերժ Սարգսյանն ասել է, որ ՀՀԿ-ում շատ մարդիկ կան, որ Աժ նախագահ կարող են լինել, սակայն այս պահին ամենանպատակահարմարը Հովիկ Աբրահամյանն է: Առաջին տեղակալ էդուարդ Շարմազանովի մասով ասել է, որ վերջինիս հետ ինքը չի խոսել, սակայն այս ամիսներին նա շատ լավ է աշխատել, և իր հետ կապված հարցականներ չկան, երկրորդ փոխնախագահի պաշտոնը նրանն է: Ինչ վերաբերում է Հերմինե Նաղդալյանին, ապա, քանի որ ԲՀԿ-ն հրաժարվեց պորտֆելներից, ելնելով գենդերային հավասարությունից, նրան ենք առաջադրում որպես երկրորդ փոխխոսնակ: Սերժ Սարգսյանը ԿԸՀ-ից քաղխորհրդի նիստի եկած նորօծյալ ՀՀԿ պատգամավորներին հարկ է համարել խստիվ զգուշացնել՝ կառավարության հետ պետք է աշխատել միասնական, թիմում որևէ տարաձայնություն չպետք է լինի, կառավարության՝ Աժ բերված օրենսդրական նախաձեռնություններին «դեմ խոսել-բան չլինի»: Ում է ցանկացել ինչ ասել՝ ՀՀԿ-ում չեն մեկնաբանում, բայց բազմանշանակ ժպտում են: Հասկանալի է, որ ինքնուրույնության նշույլներ անգամ ՀՀԿ-ականներն այլևս չեն դրսևորելու: Նրանց շարքերում այսուհետ զորանոցային կարգուկանոն է տիրելու: