Այսօր Դրաստամատ Կանայանի (Դրո) ծննդյան օրն է

Այսօր Հայ ազգային հերոս Դրաստամատ Կանայանի (Դրո) ծննդյան օրն է: Ազատագրական շարժման գործիչ, ՀՅԴ անդամ և Հայաստանի Առաջին Հանրապետության պաշտպանության նախարար Դրաստամատ Կանայանը (Դրո) ծնվել է 1884-ի մայիսի 31-ին Իգդիրում, երիտասարդ տարիքից անդամակցել է Հայ հեղափոխական դաշնակցությանը: 1905-ին կուսակցության հանձնարարությամբ ահաբեկել է Բաքվի նահանգապետ, հայատյաց Նակաշիձեին: Հաջորդ տարիներին զբաղվել է Արևմտյան Հայաստան զենք փոխադրելով:

1914- նոյեմբերին եղել է Կամավորական երկրորդ ջոկատի հրմանատար: Դրոն արդեն մեծ հեղինակություն ուներ որպես հրամանատար օսմանյան բանակի դեմ տարած հաղթանակներով: 1918-ի մարտից մինչև 1918-ի ապրիլ Հայոց ազգային խորհրդի կողմից նշանակվել է Արևմտյան Հայաստանի ռազմական կոմիսար:

1918-ի մայիսի 23-ին նշանակվել է Ապարանի հերոսամարտի հրամանատար: Հերոսամարտի օրերին՝ մայիսի 23-29-ին նրա գլխավորությամբ հայկական ուժերը պարտության են մատնել թուրքական շուրջ 13.000-անոց բանակին և կասեցրել են Ապարանի կողմից նրանց մուտքը Արարատյան դաշտ:

1918-1920-ին Դրաստամատ Կանայանը դառնում է Հայաստանի առաջին հանրապետության պաշտպանության նախարար և գլխավորում հայկական զինված ուժերը մի շարք հաջող մարտերում:

Որպես պաշտպանության նախարար, մինչև 1918-ի վերջը Դրոն իր վրա է վերցնում 1918-ի հայ-ադրբեջանական և հայ-վրացական պատերազմների պատասխանատվությունը, իսկ ավելի ուշ՝ 1920-ին, հայ-թուրքական պատերազմինը:

1920-ի Առաջին հանրապետության վերացումից հետո Դրոն անցնում է Իրան, այնտեղից՝ Գերմանիա: Դրոն ակտիվ գործունեություն է ծավալել Երկրորդ համաշխարհային պատերազմի ժամանակ: Անուրանալի դեր ունի Եվրոպայի հայերին և հայ ռազմագերիներին փրկելու գործում։

Երկրորդ համաշխարհային պատերազմի ավարտից հետո Դրոն հաստատվում է ԱՄՆ-ում, որտեղ շարունակվել է զբաղվել քաղաքական ակտիվ գործունեությամբ հայկական հարցի լուծման համար:

Դրոն վախճանվել է 1956-ի մարտի 8-ին՝ Բոստոնում:

ՀՀ պաշտպանության նախարարությունը, Դրոյի ժառանգների միջնորդությամբ, հիմնել է Դրաստամատ Կանայանի անվան ռազմավարական ակադեմիան:

2001-ի հունվարին ՀՀ պաշտպանության նախարարությունը սահմանել է «Դրաստամատ Կանայան» գերատեսչական մեդալը, որով պարգևատրվում են ռազմական ուսուցման բնագավառում աչքի ընկած զինվորականները, ազատամարտիկները և քաղաքացիական անձինք:

2000թ. մայիսի 28-ին՝ Առաջին հանրապետության հռչակման օրը, Դրաստամատ Կանայանի (Դրո) մարմինը վերահուղարկավորվեց Ապարանի հերոսամարտի հուշահամալիրի աջ եզրաթմբի վրա: