Գիշերային հրավառությունները՝ ոստիկանության ուշադրության կենտրոնում

Վերջին շրջանում հաճախակի են դարձել քաղաքացիների բողոքները գիշերային հրավառություններից, որոնց պատճառով խանգարվում է մարդկանց հանգիստը։ Հատկապես ռեստորանային համալիրների շրջակայքում ապրողները հաճախ են ստիպված լինում ուշ գիշերին վեր թռչել հրավառությունների ձայներից։

Արձագանքելով դժգոհություններին և ահազանգերին՝ ՀՀ ոստիկանությունը հայտարարություն է տարածել՝ նշելով, որ օրենքով սահմանված ժամից ուշ հրավառություններ կազմակերպողները պատասխանատվության են ենթարկվելու օրենքով սահմանված կարգով։ Հայտարարության մեջ մասնավորապես ասված է.

«Հրավառությունները վերջին տարիներին մեր կենցաղի մասն են դարձել: Գեղեցիկ ավանդույթ է, անշուշտ, սակայն ամեն ինչ գեղեցիկ է չափի մեջ, տվյալ դեպքում՝ օրենքի սահմաններում: Ցավոք, հրավառություններ պատվիրողներն ու կազմակերպողները երբեմն չեն կատարում օրենքի պահանջը:
Հրավառությունները ժամը 23.00-ից հետո արգելված են, սակայն բոլորը չէ, որ պահպանում են այս սահմանափակումը. հաճախ ականատես ենք և՛ կեսգիշերային, և՛ ավելի ուշ ժամի հրավառությունների:

Իհարկե, տոնախմբությունն ուրախ հրավառությամբ եզրափակելն արգելված չէ, բայց ուրախության տերը պետք է հիշի ոչ միայն իր, այլև ուրիշների իրավունքների մասին. չէ՞ որ շրջակայքում մարդիկ են ապրում՝ ծերեր, հիվանդներ, երեխաներ, կանայք, որոնց գիշերային անդորրը խախտվում է հրավառությամբ՝ չխոսելով արդեն հնարավոր ավելի ծանր հետևանքների մասին:

Ցավոք, այս իրողությունը երբեմն չեն ընկալում և իրավունքի ու պարտականության սահմանը խախտում են նաև զվարճանքի վայրերի սեփականատերերն ու պատասխանատուները:

Այս իրավիճակն այլևս անհանդուրժելի է, և ընդառաջելով քաղաքացիների բազմաթիվ բողոքներին' ոստիկանությունը հետևողական է լինելու հրավառությունների սահմանված կարգը պահպանելու, խախտումները կանխելու, օրինախախտներին պատասխանատվության կանչելու գործում:
Եվ այնուամենայնիվ, համակեցության կանոնների պահպանման հարցում հաջողության գրավականը ոչ թե կանխարգելումն ու պատիժն են, այլ հանդուժողականությունը, փոխադարձ հարգանքն ու օրինապահությունը:

Ոստիկանությունը պատրաստակամ է այս դաշտում սերտորեն համագործակցելու բարի կամքի տեր բոլոր կառույցների ու քաղաքացիների հետ»։