Այս տարի Հայաստանում գրանցվել է օձերի խայթելու 28 դեպք

Այս տարի Հայաստանում գրանցվել է օձերի խայթելու 28 դեպք: Այս մասին այսօր լրագրողների հետ հանդիպման ժամանակ հայտարարեց հանրապետության գլխավոր թունաբան Միքայել Գաբրիելյանը: Նրա խոսքով՝ նախորդ տարի գրանցվել է 135 նման դեպք: 

«Մեր բժշկական կենտրոնում այս տարի միջին ծանրությամբ մի դեպք է միայն գրանցվել»,- նշեց նա: Հարցին, թե ինչ անել, եթե օձը կծել է, թունաբանը պատասխանեց, որ կապել, այրել, տրվածք անել չի կարելի:

Կենդանաբանական այգու ակվատեռարիումի բաժնի վարիչ, «Էկզոտարիում» ընկերության տնօրեն Կարեն Մարտիրոսյանն էլ տեղեկացրեց, որ Հայաստանում օձերի 23 տեսակ կա, որոնցից թունավոր են միայն 4-ը: Նրա խոսքով, օձերը գարնանը հատկապես ակտիվ են, որովհետև ձմեռանոցներից դուրս են գալիս, և սկսում է ակտիվ բեղմնավորման շրջանը:

«Պատճառը նաև այն է, որ մասսայական շինարարություններ են տեղի են ունենում Հայաստանում: Բները քանդվում են ու նրանք ստիպված են լքել տարածքներն ու մտնել բնակայավրեր, այգիներ, տներ»,- ասաց բանախոսը՝ հավելելով, որ ահազանգերի մեծ մասը ոչ թունավոր օձերին է վերաբերում:

Մարտիրոսյանը նշեց նաև թունավոր և ոչ թունավոր օձերին տարբերակելու մի քանի միջոց: Նրա խոսքով՝ թունավոր օձերի դեպքում թեփուկները շարունակվում են ամբողջ գլխի շրջանում, նրանց աչքի բիբը ուղղահայաց է ու պոչը կտրուկ ավարտվում է, իսկ ոչ թունավոր օձերի դեպքում մանր թեփուկները գլխի շրջանում ավարտվում են, իսկ բիբը կլոր է:

Մարտիրոսյանը խորհուրդ տվեց երեկոյան և վաղ առավոտյան զգուշանալ, քանի որ օձերը հիմնականում այդ ժամանակահատվածում են դուրս գալիս: Նա հորդորեց խուսափել ձեռք տալ կենդանուն՝ անկախ թունավոր է, թե ոչ: