Մշակույթն է, որ մեզ ասուն է դարձնում, այլապես ինչո՞վ ենք տարբերվում չորքոտանիներից. Ազատ Գասպարյան

Հեռու ենք գնացել մշակույթից, բայց այդ հրաշքը պետք է պահպանել։ Այսօր լրագրողների հետ հանդիպմանը նման տեսակետ հայտնեց դերասան Ազատ Գասպարյանը։

Գասպարյանը շնորհավորելով մշակույթի համաշխարհային օրվա առթիվ, ընդգծեց, որ օրը զուգադիպել է ԱԺ հինգերորդ գումարաման անդրանիկ նիստին, և ցանկություն հայտնեց, որ նորընտիր ԱԺ–ն մտածի մշակույթի մասին։

«Մշակույթն է, որ մեզ ասուն է դարձնում, այլապես ինչո՞վ ենք տարբերվում չորքոտանիներից»,– ասաց Գասպարյանը։

Ասուլիսի մյուս բանախոս՝ քանդակագործ, Կարաբալա արձանի հեղինակ Լևոն Թոքմաջյանն էլ նշեց, որ ուրախ է, որ այսօր Հայաստանում ձևավորվել է երիտասարդների մի խումբ, ովքեր շատ ակտիվ են և նախաձեռնող։

«Մենք տեսանք , թե նրանք ինչ արեցին Մաշտոցի պուրակի հարցում»,–ասաց Թոքմանջյանը, և անդրադառնալով Կարաբալայի արձանը տեղաշարժելուն, ասաց.

«Այսօր շուրջ 500 երիտասարդ ստորագրություն է հավաքել, դիմել քաղաքապետին, որ ճշմարտությունը վերականգնվի։ Խնդիրը Կարաբալան չէ, այլ այն հարցը, որ օրենքը վերականգնվի։ Կարող է մի օր էլ, մեկի խելքին փչի Սասունցի Դավթի արձանը առնի, տանի իր այգում դնի»։

Ասուլիսի բանախոսներն անդրադարձան նաև Փակ շուկան քանդելուն, նշեցին, որ դեմ են մշակութային արժեքները ոչնչացնելուն։

«Լսել եմ այնտեղ հերթական «Yerevan City» են կառուցելու։ Ինչպե՞ս կարելի է ճարտարապետական կոթողը քանդել»,– ասաց Թոքմանջյանը։

Լրագրողներից մեկի այն դիտարկմանը, որ քիչ առաջ Սամվել Ալեքսանյանը լրատվամիջոցներից մեկի հետ զրույցում նշել է, որ «Yerevan City» այնուամենայնիվ չի կառուցվելու, իսկ Փակ շուկայի տանիքը «ինքն իրեն է քանդվել», քանդակագործն ասաց. «Միևնույն է՝ չեմ հավատում։ Միայն ուրախ կլինեմ, բայց չեմ հավատում»։