Ռուսաստանի արտաքին գործերի նախարարությունը կոչ է անում պայքարել «Աֆղանական թմրադեղերի սպառնալիքի դեմ»

Արտաքին գործերի նախարար Սերգեյ Լավրովը, հանդես գալով Մոսկվայում ընթացող միջազգային համաժողովում, կոչ է արել պայքարել «Աֆղանական թմրանյութերի սպառնալիքի դեմ»` ոչնչացնելով ափիոնի պլանտացիաները։

 Նա իր զարմանքն է հայտնել՝ ասելով, որ ՆԱՏՕ-ն՝ մասնավորապես ԱՄՆ-ը, չի ցանկանում ոչնչացնել այդ երկրում ափիոնի մշակաբույսերը, քանի որ վախենում է, որ այն դժվարություններ կստեղծի գյուղատնտեսական արտադրության համար, ինչն էլ իր հերթին կհանգեցնի ֆերմերների «Թալիբան» շարժմանը միանալուն։

«Մեզ համար դժվար է հասկանալ, թե ինչու մեր ամերիկացի գործընկերները չեն ցանկանում աջակցել միջազգային անվտանգությանը Աֆղանստանում։

... Բայց ինչ–որ պատճառներով Կոլումբիայում և Լատինական Ամերիկայի երկրներում ոչնչացնում են կոկաինի մշակաբույսերը, որը բացարձակ գերակա խնդիր է մեր գործընկերների համար», - ասել է Լավրովը։
Աֆղանստանը թմրադեղերի արտադրության համաշխարհային առաջատարն է, որը  ապահովում է ափիոնի առևտրի «սև շուկա»–ի ավելի քան 80%-ը։

Ըստ Ռուսաստանի թմրամիջոցների վերահսկման դաշնային ծառայության տարածած հաղորդագրության՝  Աֆղանստանում տարեկան արտադրվում է 150 մլրդ դոլլարի հերոին և մոտ 30 մլրդ դոլլարի հաշիշ։ Իսկ դրանց համար արտաքին շուկա դուրս գալու՝ մասնավորապես Եվրոպայի և Ռուսաստանի համար տարանցիկ ճանապարհ է համարվում Պակիստանը։