Մեր արտաքին գերատեսչությունները պետք է ավելի հետևողական լինեն իրենց աշխատանքում. Նաիրա Զոհրաբյան

ԲՀԿ խմբակցության պատգամավոր Նաիրա Զոհրաբյանը, անդրադառնալով ԱՄՆ պետքարտուղար Հիլարի Քլինթոնի՝ Հայաստան կատարելիք այցին, նշեց, որ, քանի որ դա տարածաշրջանային այց է, հանդիպման ընթացքում, հավանաբար, կքննարկվի տարածաշրջանում առկա խնդիրների փաթեթը։ Նրա կարծիքով՝ քննարկվող հարցերի օրակարգում կլինեն նաև հայ–թուրքական հարաբերությունները։

«Թե ինչ զարգացումներ կունենան, դժվար է, իհարկե, կանխատեսել։ Համենայն դեպս, ես, որպես «Բարգավաճ Հայաստան» կուսակցության ներկայացուցիչ, կարող եմ պնդել մեր սկզբունքային դիրքորոշումը, որ, այո՛, Եվրոպայի վերջին փակ սահմանը պետք է բացվի, այո՛, 20–րդ դարում պետք է քաղաքակիրթ հարաբերություններ ունենալ հարևանների հետ, բայց դա երբեք և երբևէ չպիտի լինի մեր ազգային և պետական շահերի հաշվին։ Սա՝ միանշանակ», – կուսակցության տեսակետը հայտնեց պատգամավորը։

ԱԳՆ տարածած հաղորդագրության համաձայն՝ քննարկվող հարցերի շրջանակում է լինելու նաև Ղարաբաղյան կոնֆլիկտը։ Նշենք, որ ԱՄՆ պետդեպի տարեկան զեկույցում Հայաստանի մասով տեղ էր գտել մի նախադասություն («Հայ անջատողականները Հայաստանի աջակցությամբ շարունակում են վերահսկել ադրբեջանական Լեռնային Ղարաբաղ շրջանը եւ հարակից 7 ադրբեջանական շրջանները»), որը մտահոգությունների տեղիք էր տվել, թե դա կարող է արտահայտվել ԼՂ հարցի կարգավորման՝ ԱՄՆ–ի դիրքորոշման մեջ։

«Ցավոք սրտի, պարբերաբար, հատկապես՝ վերջին շրջանում, միջազգային տարբեր կազմակերպությունների զեկույցներում սպրդում են նման ձևակերպումներ, և այստեղ է, որ մեր արտաքին գերատեսչությունները պետք է ավելի հետևողական լինեն իրենց աշխատանքում», – հարցի վերաբերյալ կարծիք հայտնեց պատգամավորը՝ հավելելով, որ դա «որոշակի թերացման արդյունք է»։