Այսօր երեխաների պաշտպանության միջազգային օրն է

Այսօր հունիսի 1-ն է՝ երեխաների պաշտպանության միջազգային օրը: ՀՀ-ում Երեխաների պաշտպանության օրը հունիսի 1-ին նշելու սովորույթը հաստատվել է դեռ Սովետական Միության օրոք:

Երկրորդ համաշխարհային պատերազմից հետո երեխաների առողջության պահպանման և բարեկեցության հիմնախնդիրները ստացան սոցիալական մեծ հնչեղություն: Երեխաների իրավունքների պաշտպանության միջազգային օրը տոնելու որոշումը ընդունվել է 1949 թ. Փարիզում տեղի ունեցած Կանանց միջազգային դեմոկրատական ֆեդերացիայի համաժողովում: Մեկ տարի անց՝ 1950 թ. հունիսի 1-ին, աշխարհի 51 երկրներում առաջին անգամ նշվեց երեխաների իրավունքների պաշտպանության օրը:

Այս տոնը նպատակ ունի ամբողջ աշխարհում ուշադրություն հրավիրել երեխաների հիմնախնդիրների վրա, շեշտադրել երեխաների իրավունքների պաշտպանության կարևորությունը:

Կարելի է ասել, որ երեխաների պաշտպանության անհաժեշտության գիտակցման առումով 20-դարը բեկումնային էր: Օրինակ՝ Միջնադարյան Եվրոպայում մանկությանը՝ որպես կյանքի առանձին փուլի, շատ քիչ ուշադրություն էր դարձվում: Համարվում էր, որ նորածնության փուլից հետո, երեխաներն ըստ էության ոչնչով չեն տարբերվում չափահասներից: Երեխաների խոցելիությունը և նրանց իրավունքների պաշտպանության անհարժեշտությունը որպես փիլիսոփայական հայեցակետ չէր ընդունվում: Ավելի ուշ Ջ. Լոկի, Ժ. Ռուսոյի և այլ հեղինակների աշխատություններում շեշտադրվում էր միջավայրի կարևորությունը երեխայի դաստիարակության գործընթացում: 20-րդ դարում անձի զարգացման տեսությունները ապացուցեցին, որ մանկությունը կյանքի առանձնահատուկ փուլ է, մարդու զարգացման ամենաինտենսիվ շրջանը, որը պահանջում է հատուկ ուշադրություն:

Այսօր ևս ամբողջ աշխարհում երեխաները ունեն բազմաթիվ հիմնախնդիրներ, ցավոք, Հայաստանն էլ զերծ չէ դրանից:

Մարդիկ ամբողջ աշխարհում պետք է միավորվեն երեխաների բարեկեցիկ կյանքի և երջանիկ ապագայի համար մղվող պայքարում:

Ինչպես հայ մեծ բանաստեղծ Հովհաննես Թումանյանն է ասել.
«Լիներ հեռու մի անկյուն, Լիներ մանկան արդար քուն, Երազի մեջ երջանիկ
Հաշտ ու խաղաղ մարդկություն»:

Երեխաների պաշտպանության միջազգային օրն ունի դրոշ: Կանաչ գույնը խորհրդանշում է ներդաշնակությունը, թարմությունը և պտղաբերությունը, երկրագունդը խորհրդանշում է ընդհանուր տունը, իսկ տարբեր գույն ունեցող մարդկանց նշանները՝ սոցիալական բազմազանությունը և հանդուրժողականությունը:

Անուշ Դանոյան