Համաշխարհային ֆինանսական գիգատներ Ռոթշիլդների ու Ռոքֆելերների կայսրությունները միավորել են իրենց բիզնես ակտիվները

Եվրոպայի և ԱՄՆ–ի երկու ամենահին ֆինանսական դինաստիաները՝ Ռոքֆելերները և Ռոթշիլդները իրենց բիզնես ակտիվները միավորելու համաձայնագիր են ստորագրել։

Դաշինքը անվանվել է՝ որպես Ջեյկոբ Ռոթշիլդին պատկանող RIT Capital Partners–ի և Դեյվիդ Ռոքֆելերին պատկանող Rockefeller Financial Services ներդրումային հիմնադրամների ռազմավարական համագործակցություն։ «RIT Capital Partners»–ը ձեռք է բերել Rockefeller Financial Services ընկերության 37% բաժնեմասը, որը Ռոթշիլդին դիրքերն ամրապնդելու հնարավորություն է տալիս ԱՄՆ–ում, գրում է Financial Times պարբերականը։ 

Սույն որոշումն ընդունվել է աշխարհում առավել ազդեցիկ լեգենդար ընտանիքների անդամներ՝ 96-ամյա Դեյվիդ Ռոքֆելերի և 76-ամյա լորդ Ջեյկոբ Ռոթշիլդի կողմից, որոնք ավելի քան կես դար անձնական կապեր ունեն միմյանց հետ։

Հիշեցնենք, որ Rockefeller Financial Services ընկերությունը ստեղծվել է 1882–ին, երբ Ջոն Դեվիս Ռոքֆելերը ստեղծեց աշխարհում սեփական կապիտալի կառավարման առաջին ընկերությունը։

Ավելի քան 100 տարի գործունեություն ծավալող ընկերությունը դարձել է աշխարհի մի շարք հարուստ ընտանիքների ֆինանսական ակտիվների, հիմնադրամների, ֆինանսական ինստիտուտների կառավարիչը, և այժմ ընկերության ընդհանուր կապիտալը գնահատվում է 34 միլիարդ դոլար։ Ընկերության հաճախորդներից են Vallares նավթային և գազային ընկերությունը, Johnson & Johnson ընկերության կապիտալը, Dell ընկերության, Procter & Gamble և Oracle ընկերությունների ակտիվները։ «Rockefeller Financial Services»–ի բաժնետոմսերի մեծ մասը պատկանում է Ռոքֆելերների ընտանիքին։

Փորձագետների կարծիքով, այդ միավորման, որի բանակցությունները սկսվել էր դեռ 2 տարի առաջ, գլխավոր պատճառը կապված է համաշխարհային տնտեսության անկայունությամբ, եվրագոտու տնտեսական ճգնաժամի և եվրոպական միասնական արժույթի՝ եվրոյի հնարավոր վերացման հետ։