Քավլի մրցանակի 2012-ի դափնեկիրները հայտնի են

Օսլոյում հայտարարվել են Քավլի մրցանակի հաղթողները։

Աստղաֆիզիկայի ասպարեզում մրցանակ է ստացել Կալիֆոռնիայի համալսարանից Դեվիդ Ջուիթը, Մասաչուսեթսի համալսարանից Ջեյն Լուն և Կալիֆոռնիայի տեխնոլոգիական համալսարանից Մայքլ Բրաունը։ Նրանց այս պատվավոր մրցանակը տրվել է Կոյպերի գոտու և դրանում երկնային մեծ մարմինների հայտնագործության և նկարագրության համար, ինչը թույլ է տվել ավելի լավ հասկանալ Արեգակնային համակարգության կառուցվածքը և նրա էվոլյուցիան։ Կոյպերի գոտին գտնվում է Նեպտունի ուղեծրից այն կողմ, Արեգակից մոտ 30 աստղագիտական միավոր (մեկ աստղագիական միավորը Երկիր-Արեգակ հեռավորութունն է՝ մոտ 150,000,000 կիլոմետր) հեռավորության վրա և բաղկացած է գերազանցապես Արեգակնային համակարգության կազմավորումից մնացած «փոքր» բեկորներից։

Նանոտեխնոլոգիաների ոլորտում մրցանակի են արժանացել Միլդրեդ Դրեսսելհաուզը (MIT), նանոկառուցվածքներում ֆոնոնների և էլեկտրոնների փոխազդեցության, ինչպես նաև ջերմության տարածման բեկումնային ուսումնասիրության համար։ Ֆոնոնները քվազիմասնիկներ են և իրենցից ներկայացնում են բյուրեղացանցում ատոմների տատանողական շարժման քվանտներ։ Դրանք իրենց ներդրումն ունեն բյուրեղների ջերմունակությունում, ինչը հատկապես զգալի է նանոկառուցվածքների դեպքում։

Վերջապես, նեյրոլոգիայի ասպարեզում մրցանակը բաժին է ընկել Կորնելիուս Բարգմանին (Ռոկֆելլերի համալսարան), Ուինֆրիդ Դենքին (Բժկական հետազոտությունների ինստիտուտ) և Էնն Գրեբլին (MIT) «որոշումների ընդունման և ընկալման գործում նեյրոնների աշխատանքի բազային մեխանիզմների պարզաբանման համար»։

Քավլի մրցանակը հիմնվել է 2007 թվականին և տրվում է տարին երկու անգամ։ Մրցանակի չափը կազմում է մոտ մեկ միլիոն դոլար։ Հաղթողներն ընտրվում են հատուկ հանձնաժողովի կողմից, որը կազմված է համապատասխան ոլորտների մասնագետներից։