Հիլարի Քլինթոնից իշխանությունը պետք է հստակեցում պահանջի Ղարաբաղի հարցում. Կիրո Մանոյան

ԱՄՆ պետքարտուղար Հիլարի Քլինթոնի այցելությունը Հայաստան բավական կարևոր իրադարձություն է տարածաշրջանում, որովհետև դա ցույց է տալիս այն մտահոգիչ իրավիճակը, որ առկա է մեր տարածաշրջանում։ Այս մասին լրագրողների հետ հանդիպմանն ասաց ՀՅԴ Բյուրոյի Հայ դատի գրասենյակի ղեկավար Կիրո Մանոյանը։

Նրա խոսքերով, Քլինթոնի այցը կապված է Իրանի հետ ԱՄՆ–ի խնդիրներին՝ հատկապես Ռուսատանի նախագահական ընտրություններից հետո, Իրանի հարևան տարածշրջանում հիշեցումներ և հստակեցում կատարելու։

Բանախոսի կարծիքով, այս ընթացքում, անկախ Իրանի հարցերից, մեզ համար կարևոր են ԱՄՆ–Հայաստան հարաբերությունները, և այն ուղղությունները, որոնց նկատմամբ ԱՄՆ–ն հետաքրքրություն ունի՝ հատկապես Հայաստան–Թուրքիա հարաբերություններին և Ղարաբաղի հարցին։

«Կարծում եմ պետքարտուղարից իշխանությունը պետք է հստակեցում պահանջի Ղարաբաղի հարցում։ Իսկապե՞ս Միացյալ Նահանգները համոզված է, որ Ղարաբաղի հարցի լուծումը պետք է լինի նաև ինքնորոշման իրավունքի սկզբունքի հիման վրա, թե՞ այնպես ինչպես բանաձևվված էր Նատոյի վեհաժողովի վերջին հռչակագրում. խոսքը տարածքային ամբողջականության մասին է։ Անհրաժեշտ է, որ Միացյալ նահանգները այս հստակեցումը կատարի, այլապես, մենք պետք է սկսենք մտածել, այդ բանակցությունների ֆորմատը Մինսկի խմբի համանախագահների համար ընդունելի՞ է, թե՞ ոչ»,– ասաց Մանոյանը։

Նրա խոսքերով, եթե ԱՄՆ–ն չի հրաժարվել իր այն մոտեցումից, որ հայտարարել էր որպես Մինսկի խմբի համանախագահող երկիր, ուրեմն Միացյալ նահանգները պետք է իր կեցվածքը պահպանի բոլոր ատյաններում, բոլոր ժամանակներում, որպեսզի Ադրբեջանի համար հստակ լինի, որ խնդրի լուծման այլ տարբերակ չկա։

Անդրադառնալով նաև Հայաստան–Թուրքիա հաաբերություններին, Կիրո Մանոյանը նշեց, որ Միացյալ նահանգները Թուրքիայից պետք է պահանջի լուրջ մոտենալ Հայաստանին վերաբերող հարցերին։ Իսկ դրա հիմնական միջոցը, ըստ Մանոյանի, Միացյալ նահանգների գործադիր իշխանության կողմից հայոց ցեղասպանության ճանաչման վերահաստատումն է։