Մենդելեևի աղյուսակի երկու գերծանր տարրեր ստացել են պաշտոնական անվանում

Տեսական և կիրառական քիմիայի միջազգային միությունը (IUPAC) պաշտոնապես հաստատել է Մենդելեևի պարբերական համակարգի 114-րդ և 116-րդ տարրերի նոր անվանումները։ 114-րդ տարրը ստացել է Ֆլերովիում (Fl), իսկ 116-րդը՝ Լիվերմորիում (Lv) անունը։ Պաշտոնական անվանումները կտպագրվեն Pure and Applied Chemistry պարբերականի հուլիսյան համարում։

Այսիպիսով, IUPAC-ն ընդունէլ է դեռ 2011 թվականին այս գերծանր տարրերն առաջին անգամ սինթեզած գիտնականների ռուս-ամերիկյան խմբի առաջարկը։

114-րդ կարգահամարով տարրն առաջին անգամ սինթեզվել է 2000 թվականին Դուբնայի Միջուկային հետազոտությունների միացյալ ինստիտուտում, ՌԱԱ ակադեմիկոս Յուրի Օգանեսյանի ղեկավարությամբ։ 116-րդ տարրը ստացվել է նույն խմբի կողմից 4 տարի անց։ 2011-ի հունիսին IUPAC-ը Տեսական և կիրառական քիմիայի միջազգային միության հետ համատեղ պաշտոնապես ճանաչել է ֆիզիկոսների արդյունքները, ինչից հետո նրանց տրվել է սեփական հայտնագործություններն անվանակոչելու իրավունք։ Գիտնականներն առաջարկել էին դրանք անվանել աշխատանքն իրականացրած երկու լաբորատորիաների անուններով։

Ֆլերովիումը, որը մինչ պաշտոնական անվանակոչումը, կոչվում էր ունունկվադիում, անվանվել է Ֆլերովի անվան Միջուկային ռեակցիաների լաբորատորիայի պատվին. դրանում է այն սինթեզվել։ Գեորգի Նիկոլաևիչ Ֆլերովը (1913-1990) սովետական ֆիզիկոս էր, ակադեմիկոս, Դուբնայի Միջուկային հետազոտությունների միացյալ ինստիտուտի հիմնադիրը։ 1940 թվականին նա հայտնագործել էր ռադիոակտիվ փոխակերպումների նոր տեսակ՝ ուրանի միջուկների սպոնտան (ինքաբերական) քայքայումը։

Լիվերմորիումն իր անվանումը ստացել է Կալիֆոռնիայի Լիվերմոր քաղաքի անունից, ուր գտնվում է Լոուրենսի անվան լաբորատորիան։ Դրա անդամները երկար տարիներ է համագործակցում են իրենց ռուսաստանյան գործընկերների հետ և մասնակցում գերծանր միջուկների սինթեզման աշխատանքներին։

Բացի ֆլերովիումից և լիվերմորիումից, Դուբնայի ինստիտուտում տարբեր տարիներին ստացվել են նաև 104, 113, 115, 117 և 118-րդ տարրերը։