Ֆիլիպ Լեֆոր. Չկա անլուծելի հակամարտություն

Եվրոպական ուսումասիրությունների կենտրոնի և Հայաստանում Եվրոպական Միության պատվիրակության հրավերով Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ դեսպան Ֆիլիպ Լեֆորը ԵՊՀ-ում հանդիպեց դասախոսական անձնակազմի, փորձագետների, ուսանողների և լրագրողների հետ:

Հանդիպումը նվիրված էր ԵՄ արտաքին և անվտանգության քաղաքականությանը, հարավկովկասյան մարտահրավերներին և հակամարտությունների կարգավորման գործում ԵՄ դերակատարությանը:

Լեֆորի խոսքերով՝ ԵՄ-ի ներկայությունը հարավկովկասյան տարածաշրջանում ունի մի շարք նպատակներ, որոնցից է՝ տարածաշրջանում խաղաղության հաստատումն ու պահպանումը, պատերազմների բացառումը, ինչպես նաև տարածաշրջանը որպես կովկասյան միջանցք օգտագործեռլը՝ հետապնդելով տնտեսական և քաղաքական շահեր՝ միևնույն ժամանակ բացառելով աշխարհաքաղաքական մրցակցությունը:

Անդրադառնալով Ղարաբաղյան հիմնախնդրին՝ Ֆիլիպ Լեֆորը համոզմունք հայտնեց, որ չկա անլուծելի հակամարտություն, և պետք է բացառել հայ-ադրբեջանական հակամարտության խորացումը: Նրա խոսքով՝ հակամարտությունների խաղաղ կարգավորման լավագույն տարբերակը ԵԱՀԿ Մինսկի խմբի ձևաչափն է.

«ԵԱՀԿ Մինսկի խմբի կողմից կա մշակված սցենար, որը հիմնված է Մադրիդյան սկզբունքների վրա, իսկ փոխելով խաղաղ կարգավորման այդ սցենարը' մենք մեծացնում ենք փակուղում հայնտվելու գործընթացի հավանականությունը»,- նշեց ԵՄ հատուկ ներկայացուցիչը:

Ամփոփելով երկու երկրների միջև հակամարտությունների լուծման հնարավոր տարբերակները՝ Ֆիլիպ Լեֆորը կարևորեց այն փաստը, որ հակամարտության լուծումը, հաշտեցման գործընթացը և հետագա զարգացումը կախված է միմիայն հակամարտող կողմերից, իսկ արդյունքների վրա միջազգային գործընկերների հնարավոր ազդեցությունը միայն բացասական հետևանք կարող է ունենալ հակամարտող կողմերի համար: