Նորընտիր ԱԺ–ից որևէ ակնկալիք չպետք է ունենալ. Կիրո Մանոյան

Թուրքիայի նախագահ Գյուլի վերջերս արած հայտարարությունները ավելի շատ շղարշ են, ուղղված միջզգային հանրությանը, որը նպատակ ունի ցույց տալու, թե իբր Հայաստան–Թուրքիա հարաբերություններում կա ինչ-որ գործընթաց, սակայն իրականում ոչ մի գործընթաց էլ չկա: Այս մասին այսօր լրագրողների հետ հանդիպմանն ասաց ՀՅԴ Հայ դատի և քաղաքական հարցերի գրասենյակի ղեկավար Կիրո Մանոյանը:

Մանոյանը վերանայելով վերջին շրջանի իրադաձությունները, կարծում է, որ անհրաժեշտ է, որ Հայաստանը Միացյալ նահանգներից պահանջի, որ ԱՄՆ–ն ճնշում բանեցնի Թուրքիայի վրա՝ առանց նախապայմանների Հայաստանի հետ հարաբերություններ ստեղծելու համար։

«Աշխարհին պետք է հայտարարել, որ արդեն երկար ժամանակ է տրվել Թուրքիային, որպեսզի Հայաստանի հետ հարաբերությունները կարգավորի, իսկ քանի որ Թուրքիան մինչ այժմ շարունակում է նախապայմաներով խոսել, Հայստանը իր ստորագրությունը ետ է վերցնում Հայաստան-Թուրքիա արձանագրությունից»,– ասաց Մանոյանը և հավելեց, որ ինքը վստահ չէ, կգնա՞ն այս քայլին մեր իշխանությունները, թե՞ ոչ։

Մանոյանը նկատեց նաև, որ ԱԺ ընտրությունների հնարավոր ազդեցությունը ՀՀ արտաքին քաղաքականության վրա առանձնապես մեծ գործոն չի կարող ունենալ: Ըստ նրա հնարավոր է, որ ՀՀ նախագահական ընտրությունները պատճառ հանդիսանան, որ Հայաստանն իր ստորագրությունը ետ չվերցնի հայ-թուրքական արձանագրություններից: Ինչը և կլինի իշխանական շահերի պաշտպանության համար, Արևմուտքի աջակցությունը ստանալու համար։

Մանոյանի կարծիքով, նորընտիր ԱԺ–ից որևէ ակնկալիք չպետք է ունենալ, քանի որ այն նախագահի գիծն է, քանի որ ինչպես նախկինում, այնպես էլ հիմա, ԱԺ-ն նախագահի արտաքին քաղաքականության հետևորդն է:

Բանախոսն անդրադարձավ նաև Սիրիայում տիրող իրավիճակին, և նշեց, որ այն բավական մտահոգիչ է հատկապես տեղի հայ համայնքի համար, բայց և հավելեց, որ համայնքն այս պահի դրությամբ անվտանգության հետ կապված խնդիրներ չունի: