Աստանայում անցկացվել է ԱՊՀ երկրների «Գրքարվեստ» իններորդ միջազգային մրցույթը

Ս. թ. մայիսի 24-25-ը Ղազախստանի մայրաքաղաք Աստանայում տեղի ունեցավ ԱՊՀ երկրների «Գրքարվեստ» իններորդ միջազգային մրցույթը: Մրցույթին մասնակցում էին ԱՊՀ 10 երկիր:

Հայաստանը գրքեր և ալբոմներ էր ներկայացրել մրցույթի բոլոր յոթ անվանակարգերում, որոնցից մրցանակային տեղ են զբաղեցրել չորս գիրք.

1. «Մշակույթ, գիտություն, կրթություն» անվանակարգում երկրորդ մրցանակի է արժանացել Ֆ. Գրիգորյանի «Հայկական ազգային տարազ» ալբոմը /«Անտարես» Մեդիա Հոլդինգ, 2011 թ./:

2. «Տպագրվել է ԱՊՀ-ում» անվանակարգում երկրորդ մրցանակ է շնորհվել Հ. Իգիթյանի կազմած «Հայաստանի ժամանակակից արվեստի թանգարան» ալբոմը /«Տիգրան Մեծ» հրատարակչություն ՓԲԸ, 2011 թ./:

3. «Արվեստի գիրք» անվանակարգում երրորդ մրցանակի են արժանացել Ա. Սարգսյանի երկու գիրք-ալբոմները /«Փրինթինֆո» ՍՊԸ, 2011 թ./:

4. Հատուկ դիպլոմ է շնորհվել «Ուրբաթագիրք» հուշանվերային գրքին /«Էդիթ Պրինտ» ՍՊԸ, 2011 թ./:

Ղազախստանում մրցանակի է արժանացել հայկական մեկ ժողովածու ևս: «Մենք բարեկամ ենք» մատենաշարով Էդվարդ Միլիտոնյանի «Օդեղեն տուն» մանկական բանաստեղծությունների ժողովածուն (Ալմաթի, «Բալալար էդիբիետի» հրատարակչություն, 2012 թ.)՝ տպագրված ռուսերեն լեզվով, արժանացել է «Բարեկամություն» անվանակարգի երկրորդ մրցանակին: